खोज

बुटवल, १८ असार ।

निर्धन उत्थान लघुवित्त बित्तिय संस्थामा रहेको आधिकारिक ट्रेड युनियनले असार २४ गतेदेखि देशभरका सम्पूर्ण शाखा, क्षेत्रीय कार्यालय, मुकाम र केन्द्रीय कार्यालयमा एकै पटक कार्यालयको कामकाज ठप्प पार्ने गरी विरोधको कार्यक्रम सार्वजनिक गरेको छ ।

केन्द्रीय अध्यक्ष सन्तोष कुमार आचार्यले हस्ताक्षर गरेको उक्त विरोधको कार्यक्रम पत्र प्रमुख कार्यकारी अधिकृतलाई सम्बोधन गरी लेखिएको छ । केन्द्रीय कर्मचारी समितिको छैठौं बैठकको निर्णयले जेठ २१ गते ३५ दिनको समय सिमा राखेर मागपत्र दाबी गरेको थियो । उक्त माग दाबीको समय यही असार २३ गते सकिदै छ । तर ३५ दिन सम्म पनि ब्यवस्थापन पक्षले युनियनका माग पत्रमा कुनै वास्ता नगर्नुले ब्यवस्थापन पक्षले युनियनलाई पेलेर जाने पक्षमा रहेको बुझिएकोले यसलाई युनियन पछि नहटी डटेर सामान गर्ने युनियनका केन्द्रीय सदस्य प्रकाश भट्टराईलेले बताए ।

गत वर्ष नै कर्मचारीको पारिश्रमिक पुनरावलोकन गर्नुपर्ने युनियनसँगको सम्झौता थियो । तर लघुवित्त संस्थाको हालको विषम परिस्थिति, आर्थिक मन्दी लगायतले लघुवित्तमा उल्लेखनीय नाफा नभएको हँुदा युनियनले एक बर्ष संस्थालाई आर्थिक व्ययभार नपार्ने गरी तलव वृद्धि नगर्दा समेत सहेर बसेको थियो । तर अहिले सबै ठिकठाक हँुदा समेत आर्थिक वृद्धि तथा नीतिगत, कर्मचारी बढुवा नगरी ब्यवस्थापनले आफ्नो जिम्मेवारी बिर्सिएको जस्तो भान कर्मचारी युनियनलाई परेको केन्द्रीय महासचिव कृष्ण रानाले बताए ।

संस्थागत सुशासन, कर्मचारीको बृहत्तर वृत्ति विकास सहितका मागहरु राख्दै कर्मचारी युनियनले राखेका मागहरु ब्यवस्थापन पक्षले २४ गते अगाडि नै सम्बोधन गरेर सबैलाई खुसियाली दिने विश्वास आफुलाई रहेको एक केन्द्रीय उपाध्यक्षले बताए ।

उता संस्थाका प्रमुख कार्यकारी अधिकृत मुकेश दाहालले युनियनले राखेको मागपत्रमा संस्थागत सुधार हुनुपर्ने लगायतका मागहरु सहितको मागपत्र प्राप्त भएको बताए । “विरोध कार्यक्रमको पत्र प्राप्त भैसकेपछि हामीले ब्यबस्थापनले गर्दै आएको र आगामी दिनमा गर्ने कार्य योजना पेश गरिसकेका छौ । तसर्थ युनियनले आफ्ना बिरोधका कार्यक्रमहरु तत्काललाई स्थगित गरेर असार मसान्तमा संस्थागत प्रगति गरेर साउन पहिलो हप्ता भित्र बार्ताको माध्यमबाट निकास निकाल्ने बिश्वास गरेको छु”–उनले भने । आर्थिक वर्ष २०७९÷८० को बढुवा यही आर्थिक बर्ष भित्र गर्ने गरी काम अगाडि बढिरहेको समेत उनले जानकारी दिए ।