खोज

बुटवल, १५ असार ।

रोटरीको सात फोकस एरियामा रहेर सामाजिक क्षेत्रमा पत्रकारितामार्फत कलम चलाएको भन्दै न्युज बुटवल टुडेका उपसम्पादक स्वस्तिक श्रेष्ठलाई रोटरी जर्नो अवाड प्रदान गरिएको छ ।

रोटरी ईन्टरनेशनल डिष्ट्रिक ३२९२ ले रोटरी जर्नो अवार्ड २०२३–२०२४ बाट श्रेष्ठलाई पुरस्कृत गरेको छ । २ दशकभन्दा लामो समयदेखि पत्रकारितामा क्रियाशिल श्रेष्ठ डेढ वर्षदेखि न्युज बुटवल टुडेडटकममा उपसम्पादकको रुपमा कार्यरत छन् । उनलाई ५० हजार नगद राशीसहित काठमाडौंमा आयोजित कार्यक्रममा सम्मापन गरिएको हो ।

शनिबार काठमाडौं एक समारोहका बिच उपसम्पादक श्रेष्ठसहित ७ जना पत्रकारलाई जर्नो अवार्ड प्रदान गरिएको हो । रोटरी ईन्टरनेश्नल डिष्ट्रिक ३२९२ का डिजि राजेन्द्र ध्वजु, डिजि ईलेक्ट राजेन्द्र थकाली, पुर्व डिजि सन्जय गिरि, सन्तोष रिजाल, पुरस्कारका संयोजक नम्रता शर्माले पत्रकारहरुलाई सम्मान गरेका थिए ।

स्वास्थ्य सचतेनामा स्वस्तिक श्रेष्ठ, आधारभुत शिक्षा र साक्षरतामा भोजपुरकी विधा राई, खोज पत्रकारितामा योगदान दिएका गुल्मीका रामु सापकोटा, अम्मर सुनार, बालबालिका सचेतनाको क्षेत्रमा योगदान दिएका बझाङका बसन्त प्रताप सिह, पर्वतका तिलक तिवारी, पिच एण्ड कन्फ्लिक्टमा योगदान दिएका टंक पन्थलाई नगद ५१ हजार रुपैयाँसहित सम्मानपत्रबाट पुरस्कृत गरिएको हो । यसैगरी स्वर्गीय यज्ञप्रसाद आचार्य स्मृति लाईभ टाईम एचिभमेन्ट अवार्डबाट भैरव रिसाललाई १ लाख १ हजार रुपैयाँबाट पुरस्कृत गरिएको छ । कार्यक्रममा पत्रकार सुरेश आचार्यले पत्रकारिता क्षेत्रबाट निश्वार्थ योगदान दिने एक जना पत्रकारलाई लाईभ टाईम एचिभमेन्ट अवार्ड मार्फत स्मरण गर्ने गरी स्थापना गरेको बताए ।

कार्यक्रममा डिष्ट्रिकका सचिव दिनेश मानन्धरले रोटरी जर्नो अवार्डको शुरुवात र महत्वबारे प्रकाश पार्दै रोटरीको मुलमर्मलाई मिडियाबाट सपोर्ट हुने मिडियाकर्मीहरुलाई सम्मान गर्ने परिपार्टी स्थापित भएको बताए । रोटरीमा सदस्यहरुले सदस्यता बढाउने, फष्ट राईजिङ गर्ने र बढीभन्दा सामाजिक कार्य अघि बढाउने काम तथा यस कामलाई पब्लिक ईमेज बढाउने गरी सकारात्मक परिवर्तनका बाहक र समाजमा चेतना जगाउने काम मिडियाबाट हुने उनले बताए ।

सेवामा रोटरी नारासहित २०११ मा रेडियो कार्यक्रम शुरु भएको उनले बताए । त्यसपछि लगातार सबै खाले मिडियाहरुमा समेट्ने काम भयो । नेपाल पत्रकार महासंघको समन्वयमा शिक्षा, स्वस्थ, संचारिका समूह, आर्थिक पत्रकार समाजसंग समन्वय गरी पुरस्कार वितरण गरिदै आएको उनले बताए । डिजि तिर्थमान शाक्यको कार्यकालमा जर्नो अवार्ड शुरु भएको थियो ।