खोज

काठमाडौं ।

कृषि विकास बैंक लिमिटेडले सामाजिक उत्तरदायित्व अन्तर्गत अटिजम, बौद्धिक अपाङ्गता केयर सेन्टरलाई आर्थिक सहयोग गरेको छ । चन्द्रागिरी नगरपालिका वडा नम्बर १२, बलम्बुमा सञ्चालनमा रहेको अटिजम केयर सेन्टरलाई बैंकले आर्थिक सहयोग गरेको हो । कृषि विकास बैंकका निमित प्रमुख कार्यकारी अधिकृत प्रताप सुवेदीले अटिजम भएका बालबालिकाहरुको हेरचाह, आधारभूत शिक्षण तथा सिकाई कार्यको लागि आर्थिक सहयोग हस्तान्तरण गरेको बताए ।

अधिकृत सुवेदीले अटिजम भएका बालबालिकालाई अभिभावकस्तरबाटै शिक्षण सिकाई प्रक्रियाको थालनी हुनु आफैंमा सकरात्मक पक्ष भएको बताए । उनले यस्ता सामाजिक कार्यमा कृषि विकास बैंक आगामी दिनमा समेत सँगै रहेको भन्दै अटिस्टिक परिवार र केयर सेन्टरलाई समाजस्तरबाटै सहयोग गर्नुपर्ने धारणा राखे ।

कृषि विकास बैंकका निमित प्रमुख कार्यकारी अधिकृत सुवेदीले यो बैंक सामान्य मानिसहरुको समेत कारोवार गर्ने बैंक भएको बताउँदै सेवा लिन आग्रह गरे । उनले अटिजम, बौद्धिक अपाङ्गता केयर सेन्टरलाई आर्थिक सहयोग स्वरुप एक लाख रुपैयाँ संस्थालाई हस्तान्तरण गरेका हुन् ।

सहयोग हस्तान्तरण कार्यक्रममा कृषि विकास बैंक बजार व्यवस्थापक तथा वरिष्ठ अधिकृत लिला जिसीले राज्यस्तरबाट अटिजम भएका बालबालिकालाई शिक्षा र थेरापी दिनुपर्ने दायित्वको जिम्मेवारी अभिभावकहरुबाट पूरा भएको प्रति प्रशंसा गरे ।

अटिस्टिक परिवार तथा शिक्षिकाहरुबाटै अटिजम केयर सेन्टर सञ्चालन गरेको प्रति सबैलाई धन्यवाद दिंदै यसलाई थप प्रभावकारी बनाउन आफुहरुले समेत सक्दो भूमिका निर्वाह गर्ने प्रतिवद्धता व्यक्त गरे ।

कार्यक्रममा समाजसेवी किरण प्रसाद सिग्देलले राज्यको तर्फबाट अझै पनि सबै शिक्षालाई सहयोग गर्न नसकिरहेको अवस्थामा अटिजम जस्तो जटिल र मंहङ्गो शिक्षाको थालनी गर्नु निकै चुनौतीपूर्ण रहेको बताए । यस सेन्टरलाई बचाई राख्नको लागि समुदायस्तरबाटै दैनिक मुठी दानको अवधारणालाई समेत अघि बढाई सहयोग जुटाउन सकिने उनले धारणा राखे । सिग्देलले सबै तहका सरकारबाट अटिजमका बारेमा नीतिमा समावेश भएपनि व्यवहारमा कार्यान्वयन नभएको प्रति चिन्ता व्यक्त गरे ।

अटिजम केयर सेन्टर सञ्चालन भएको स्थल बलम्बुमा जानको लागि सहज होस भनेर कृषि विकास बैंकको सहयोगमा पुथ्वी राजमार्ग अन्तर्गत गुर्जुधारा चोकदेखि बलम्बु, पशुसेवा कार्यालय, चन्द्रागिरी वडा नम्बर १२, पुलको मुख र चन्द्रागिरी वडा नम्बर १ देखि अटिजम केयर सेन्टर सञ्चालनस्थलसम्म सडकमा अटिजम केयर सेन्टर जाने बाटो लेखिएका जानकारीमुलक (न्यारेसन बोर्ड) प्लेट राखिएको हो । सो प्लेटको सुरु बैंकका निर्मित प्रमुख कार्यकारी अधिकृत सुवेदीले गरेका थिए ।
कार्यक्रमा अटिजम केयर सेन्टरकी स्पेशल एजुकेटर रंगिला श्रेष्ठले शुभकामना मन्तव्य व्यक्त गरेकी थिइन् । सो कार्यक्रममा समाजसेवी, साहित्य एवम् कलाकार पवन अधिकारीले अटिजमका बारेमा तयार पारिएको कविता बाचन गरेका थिए ।

कार्यक्रममा कृषि विकास बैंक थानकोट शाखाका प्रमुख किरण गौतमले अटिजम भएका बालबालिकाको शिक्षाको विकामा बैंक सधै तयार रहेको बताए ।

महिला उत्प्रेरणा विकास मञ्चद्धारा सञ्चालित अटिजम केयर सेन्टर बलम्बुमा अहिले आंशिक र नियमित गरी १५ जना बालबालिका सिकाई प्रक्रियामा रहेको सञ्चालक गीता घिमिरेले जानकारी दिइान् ।