खोज

बुटवल, ७ असार ।   बुटवल मिलनचोकको डेल्टा एजुकेसन मार्टमा बिहीबार सांझ ७ बजेतिर भएको आगलागी ५ घण्टापछि नियन्त्रणमा आएको छ ।

फलामै फलामबाट बनेको भवनको तेस्रो तलाबाट शुरु भएको आगलागीलाई बुटवल उपमहानगरपालिका, गौतमबुद्ध विमानस्थल, रुपन्देही, कपिलवस्तु र पश्चिम नवलपरासीका १० वटा दमकलले करिब ५ घण्टामा नियन्त्रणमा लिएका जिल्ला प्रहरी कार्यालय रुपन्देहीका सूचना अधिकारी डीएसपी मनोहर भट्टले बताए । मार्टको तेस्रो तलामा किताब,कापी सहित स्टेशनरी सामान र खेलकुदका सामान, दोश्रो तलामा कपडा तथा स्कुल कलेजका विद्यार्थीका तयारी ड्रेस, तलामा नेपालका विभिन्न कम्पनीका जुत्ता र ग्रोसरी सामान थिए । आगलागीबाट सबै तलाका सामान जलेर नष्ट भएका प्रहरीले जनाएको छ ।

१० वटा दमकलसंगै नेपाल प्रहरी र स्थानीय बासिन्दाको प्रयासमा आगलागी अन्यत्र फैलिनबाट राति नै नियन्त्रणमा आएपनि मार्टको भुई तलाको आगो बिहान ७ बजेसम्म दुई वटा दमकलले निभाइरहेका डीएसपी भट्टले बताए ।

मार्टको आसपासमा घना वस्ती र पेट्रोल पम्प समेत नजिकै भएकाले आगलागी वस्तीमा फैलिने डरले स्थानीयहरु भयभित भएका थिए । मार्टका सञ्चालकले विद्युत सर्किट सर्ट भई आगलागी भएको अनुमान गरेपनि प्रहरीले अहिले नै यही कारणले हो भन्ने पत्ता नलागेको बताएको छ ।

मार्टका सञ्चालकहरुले करिब ४० करोडको क्षति भएको जानकारी दिएपनि डीएसपी भट्टले भने क्षतिको यकिन अझै नभएको बताए ।

छ वर्ष अघि बुटवलका ठूला निजी र सरकारी विद्यालयका सञ्चालक तथा प्रिन्सिपल समेतको लगानीमा सबैखाले शैक्षिक सामग्रीहरु र विद्यार्थी ड्रेस समेत एउटै ठाउंबाट विक्रि गर्ने गरी मार्ट सञ्चालनमा आएको थियो ।