खोज

बुटवल, २४ जेठ। २४ औं राष्ट्रिय बुद्धिचाल प्रतियोगितामा झापाली खेलाडी राजन सुवेदी च्याम्पियन बनेका छन् । ११औं चरणमा प्रेमकृष्ण महर्जनलाई पराजित गर्दै ८ अंक सहित सुवेदी विजेता बनेका हुन् । सुवेदीले १९ सय २३ रेटेड प्रेमकृष्ण विरुद्ध एक अंक हात पारी सात जित, दुई बराबरी र दुई हारको नतिजा आत्मसाथ गरेका हुन् । ३५ वर्षीय सुवेदीले नयाँ विजेता बनेसँगै सेप्टेम्बर ९ देखि २३ सम्म हंगेरीमा हुने ४५ औं चेस ओलम्पियाडको लागि नेपाली टिमबाट स्थान सुरक्षित गरेका छन् ।

त्यसैगरि झापा कै सुरुत दाहालले युवा खेलाडी पुरुषोत्तम सिलवाललाई पराजित गर्दै ७।५ अंक बनाएर दोश्रो स्थानमा रहन सफल बनेका छन् । टाइब्रेकरका आधारमा समान ७।५ अंक प्राप्त गरे पनि क्षितिज भण्डारी तेस्रो स्थानमा रहेर राष्ट्रिय प्रतियोगिताको यात्रा टुङ्ग्याएका छन् ।
९ औं महिला राष्ट्रिय बुद्धिचाल तर्फ ९ अंक सहित दोस्रो पटक सिन्दिरा जोशी नेपाल च्याम्पियन हुन सफल भइन् । अन्तिम खेलमा कृतिसारा अधिकारीसंग सिन्दिरा पराजित भईन। सिन्दिराले ११ औं चरणको खेल मध्ये आठ खेलमा सफलता हात पार्न सफल भईन भने दुई खेलमा हार ब्यहोरेकी थिईन ।

यसैगरी झापाका कृतिसारा अधिकारीले ८/५ अंक जोड्दै उप विजेता बन्न सफल भईन् । उनले अन्तिम खेल आफ्नो पोल्टोमा पार्दै ओलम्पियाडको टिकट दाबि गरेकी छिन् । प्रतिस्पर्धामा उत्कृष्ट खेल पस्केकी कास्कीका पूजा भण्डारी ८ अंक प्राप्त गर्दै तेस्रो भइन । उनीसंगै ८ अंक हात पार्दै शान्ति धिमाल चौथो स्थानमा उभिन सफल भईन् । चार महिला खेलाडी ओलम्पियाडको लागि छनौट हुन सफल भएका छन् ।

नेपाल बुद्धिचाल महासंघका केन्द्रीय सदस्य राजु ताम्राकारका अनुसार हंगेरीको बुढापेष्टमा पुरुष तर्फ विवेक थिङ, रुपेश जैसवाल, राजन सुवेदी, सुरुत दाहाल र क्षितिज भण्डारी छनौट भएका छन् । महिला तर्फ सुजना लोहनी, सिन्दिरा जोशी, कृतिसारा अधिकारी, पूजा भण्डारी र शान्ति धिमाल छनौट भएका हुन् ।

नेपाल बुद्धिचाल महासंघका अध्यक्ष हेराकाजी महर्जन, लुम्बिनी इभेन्ट मेनेजमेन्टका प्रबन्धक निर्देशक सुबोधराज शेर्पाले बिजेताहरुलाई पुरस्कार वितरण गरेका छन ।