खोज

कपिलवस्तु, (बुटवल टुडे) २४ जेठ
कपिलवस्तुको यशोधरा गाउँपालिकामा सम्पन्न दोस्रो गाउँपालिका अध्यक्ष कप क्रिकेट प्रतियोगिताको उपाधी वडा नम्बर ५ ले जितेको छ । १६ ओभरको निर्धारित खेलमा वडा नम्बर ५ ले वडा नम्बर ४ लाई दुई बिकेटले पराजित गर्दै कप जितेको हो । खेलको पहिलो ईनिगंमा वडा नम्बर ४ ले १३ ओभरमा अलआउट हुदै १ सय ११ रन बनाएको थियो ।

वडा नम्बर ४ का क्याप्टेन अफताब आलमले सर्वाधिक ३५ रन बनाएका थिए भने वडा नम्बर ५ का क्याप्टेन समसाद मुसलमानले ४ बिकेट लिएका थिए । खेलको दोस्रो ईनिगंमा वडा नम्बर ५ ले १३ ओभरमा ८ बिकेटको क्षतिमा १ सय १४ रन बनाएको थियो । वडा नम्बर ५ का अतिकुर रहमानले २५ रन बनाए भने वडा नम्बर ४ का खेलाडी साहरूख खाँले ४ बिकेट लिएका थिए ।

प्रतियोगिताको म्यान अफ म्याच २४ रन बनाएर ३ बिकेट लिएका वडा नम्बर ५ का अब्दुल रहमानले जितेका थिए । बिजेता वडा नम्बर ५ लाई पुर्वमन्त्री बृजेश कुमार गुप्ता, पुर्व लुम्बिनी प्रदेशमन्त्री धर्म बहादुरलाल श्रीवास्तव, गाउँपालिका अध्यक्ष शिवदयाल तिवारी, वडा नम्बर ५ का अध्यक्ष जुबेर मुसलमान, समाजसेवी रामदास कुर्मी लगायतले कप, प्रमाणपत्र मेडल र नगद ५० हजार रूपैयाको पुरस्कार हस्तान्तरण गरे ।
त्यसै गरि प्रतियोगितामा उपबिजेता बनेको वडा नम्बर ४ लाई नगद ३० हजार सहित शिल्ड, मेडल र प्रमाणपत्र दिईएको थियो । प्रतियोगितामा वडा नम्बर ५ का जासिम खान म्यान अफ द सिरिज, वडा नम्बर ५ कै जाहिद खाँ वेष्ट ब्याटर र मोतिम अहमद वेष्ट बलर बनेका थिए । गाउँपालिकाको वडा नम्बर ५ को अनिरुद्ध पब्लिक माबिको खेल मैदानमा २० गते देखी २३ गते सम्म आयोजित खेल बर्षाका कारण बिहीबार सम्म लम्बिएको थियो । प्रतियोगितामा गाउँपालिकाका सबै ८ वडाका ८ वटा टोली सहभागी थिए ।

सो अवसरमा बोल्दै वडा नम्बर ५ का अध्यक्ष जुबेर अहमदले खेलले पालिकाका खेलाडीको दक्षता बृद्धि हुने बताए । पुर्व लुम्बिनी प्रदेशमन्त्री धर्मबाहादुरलाल श्रीवास्तवले पालिकाबाट उत्पादित खेलाडी जिल्ला हुदै अन्तरराष्ट्रियस्तर सम्म पुग्न आवश्यक रहेकोमा जोड दिए । खेलाडीले खेल भावना र अनुशासनको पालना गर्दै खेल प्रतिको दक्षता बृद्धि गर्नु पर्ने उनको सुझाव थियो ।

नेपालमा क्रिकेट खेलको भविष्य रहेकाले खेलाडीले अनुशासनको पालना गर्दै दक्षता बृद्धि गर्नु पर्नेमा पुर्वमन्त्री बृजेश कुमार गुप्ताले जोड् दिए । गाउँपालिकाले क्रिकेट सहितका खेललाई प्राथमिकता दिई खेलाडीलाई दक्ष बनाउन प्रयत्नशिल रहेको गाउँपालिकाका अध्यक्ष शिवदयाल तिवारीले बताए । उनले आगामी बर्षमा पनि अध्यक्ष कपलाई निरन्तरता दिईने प्रतिबद्धता जनाए ।