खोज

सुर्खेत, १८ जेठ ।

अत्यधिक गर्मी बढेपछि सुर्खेतको वीरेन्द्रनगरभित्रका विद्यालयहरू एक साताका लागि बन्द हुने भएका छन् । वीरेन्द्रनगर नगरपालिकाले शुक्रबार एक सूचना जारी गर्दै नगर क्षेत्रभित्रका सामुदायिक र संस्थागत विद्यालयहरु बन्द गर्ने जनाएको छ । वीरेन्द्रनगर नगरपालिका शिक्षा शाखा प्रमुख (उपसचिव) धिरेन्द्र शर्माले गर्मी अत्यधिक बढेको भन्दै वीरेन्द्रनगरभित्रका विद्यालयहरू बन्द गर्ने निर्णय गरिएको जनाए ।

बिहीवार वीरेन्द्रनगरको तापक्रम करिब ४० डिग्री मापन भएको छ । गर्मीले बालबालिकाहरूको स्वास्थ्यमा असर पर्न सक्ने भन्दै संस्थागत विद्यालय बन्द गर्ने निर्णय भएको प्याव्सन सुर्खेतका अध्यक्ष वेदप्रकाश ढकालले जानकारी दिए । उनका अनुसार गर्मीका कारण विद्यार्थीहरूको स्वास्थ्यमा हुन सक्ने असरलाई मध्यनजर गर्दै सामूहिक छलफलपछि विद्यालय बन्द गर्ने निर्णय गरिएको हो ।

यता विद्यालय बन्द हुने भएपछि खोप कार्यक्रम भने प्रभावित हुने देखिन्छ । जेठ १३ देखि २६ गतेसम्म पोलियो रोग विरुद्धको खोप अभियान सुरु भइरहेको छ । विद्यालसँगको समन्वयमा खोप कार्यक्रम सञ्चालन गर्ने तालिका तय गरिए पनि विद्यालय बन्द हुने भएपछि खोप अभियान नै प्रभावित हुन पुगेको हो । सुर्खेतका पालिकाहरूमा दुइ चरणमा खोप अभियान सञ्चालन गरिएको छ ।

वीरेन्द्रनगर, गुर्भाकोट, पञ्चपुरी नगरपालिका सिम्ता, बराहाताल र चौकुने गाउँपालिकामा २२ गतेदेखि २५ गतेसम्म खोप अभियान सञ्चालन गर्ने तालिका छ ।