खोज

बुटवल, १७ जेठ ।

नेपाल पत्रकार महासंघ पश्चिम नवलपरासी शाखामा प्रेस युनियनको एक पक्षले लगाएको ताला अर्को पक्षले आज तोडेको छ । महासंघले संञ्चालन गरेको सदस्यता शुद्धिकरण अभियान अन्र्तगत सदस्यको अन्तिम नामावली प्रति आपत्ति जनाउदै यसअघि युनियनका अध्यक्ष उमेश विक नेतृत्वको एक पक्षले महासंघमा तालाबन्दी गरेको थियो । तर आज फेरि उपाध्यक्ष सन्जिव कोईराला सहितको टोलीले ताला तोडेको छ । वार्ता र संवादबाट समस्याको समाधान खोज्नुको साटो महासंघमा तालाबन्दी गर्नु उचित नभएको भन्दै ताला तोडेर महासंघको कार्यालय संञ्चालनमा ल्याएको उपाध्यक्ष कोईराला सहित सचिव अनिल यादव र कोषाध्यक्ष श्याम बुचाँ मगरद्धारा हस्ताक्षरीत विज्ञप्तीमा जनाईएको छ ।

सदस्यता शुद्धिकरणका विषयमा अन्तिम नामावली आधिकारिक रुपमा प्रकाशन नहुदै महासंघमा आई तालाबन्दी गर्नु उपयुक्त कदम नभएको र युनियनको केन्द्रिय नेतृत्वले समेत कुनै पनि आन्दोलनका कार्यक्रम घोषणा नगरेको अवस्थामा तालाबन्दी गर्नु गलत भएको विज्ञप्तीमा उल्लेख गरिएको छ ।

नेपाल पत्रकार महासंघले सुरु गरेको सदस्यता शुद्धिकरण अभियान अन्र्तगत अहिले देशभरबाट प्राप्त नामावलीलाई अन्तिम रुप दिने काम भईरहेको छ । महासंघ नवलपरासीका अध्यक्ष हरि शर्माले केन्द्रबाट आफुहरुलाई आधिकारीक रुपमा कुनै पनि जानकारी प्राप्त नभएको भन्दै महासंघको चुनाव निजिकिदै जादा विवाद बढाउने कुरा उपयुक्त नहुने बताए । प्रेस युनियनका अध्यक्ष विकले भने महासंघमा सदस्यता सिफारिसमै चलखेल गरिएको भन्दै महासंघले टुङग्याएको अन्तिम नामावली मान्य नहुने बताए । महासंघले देशैभर संस्थामा गैरपत्रकार हावि भएको भन्दै सदस्यता शुद्धिकरणको अभियान चलाएको थियो ।