खोज

नेपालगञ्ज, ९ जेठ ।

पोलियो रोग बिरुद्धको आईपिभी खोप अभियान बाँकेमा यही जेठ १३ गतेदेखि सञ्चालन हुने भएको छ । राष्ट्रिय खोप कार्यक्रम अन्तर्गत आईपिभी खोप अभियान बाँकेमा पनि सञ्चालन गर्न लागिएको हो ।

स्वास्थ्य कार्यालय बाँकेले आइ पि भी खोप सम्बन्धी नेपालगञ्जमा बुधबार जिल्ला स्तरीय अभिमुखिकरण तथा योजना तर्जुमा गोष्ठी समेत सम्पन्न गरेको छ । कार्यक्रममा डब्लु एच ओ का डाक्टर प्रविण पौडलेलले आई पि भी खोप अभियान २०८१ मा २०७३ बैशाखदेखि २०७४ असोज सम्म जन्मिएका वालवालिकालाई खोप लगाउने तयारी रहेको जानकारी दिए ।

पोलियो रोग विरुद्धको ओ पि भी खोप एक बर्ष मुनिका वालवालिकालाई नियमित खोप सेवाको माध्यमबाट विगत लामो समयदेखि दिईदै आएको छ । त्यसैगरी यो रोग विरुद्धको अर्को खोप आई पि भी खोप २०७१ साल देखि प्रदान गर्न सुरु गरिएपनि २०७३ सालको प्रारम्भ देखि विश्व बजारमा यो खोप अभाव भएर आपूर्ति नभएका कारण दुई बर्ष भन्दा बढी अवधिसम्म यो खोप लगाउनबाट छुटेको हुँदा वालवालिकालाई पोलियो लाग्ने जोखिम रहिरहने भएकोले अहिले खोप अभियान सञ्चालन गरिरहेको डाक्टर पौडेलले प्रष्ट पारे । उनले भने ‘विश्व बजारमा आई पि भी खोप अभाव भएर नेपालमा १४ लाख वालवालिका यो खोप लगाउन छुटेका छन्, अव अभियान मार्फत छुटेका सबै वालवालिकालाई खोप लगाईने छ ।’

कार्यक्रममा स्वास्थ्य कार्यालय बाँकेका अधिकृत नरेश बाबु श्रेष्ठले अभियानबाट बाँकेमा ३५ हजार ७०५ जना ५ देखि ८ वर्ष सम्मका वालबालिकालाई खोप लगाईने लक्ष्य रहेको बताए । यो उमेर समूहका वालवालिका सबै विद्यालय जाने भएकाले विद्यालयमै गएर खोप लगाईने उनले बताए । ४३६ जना विद्यालय बाहिरका वालवालिकालाई पनि खोप लगाउने तयारी गरिएको उनले जानकारी दिए । अभियानको तयारी पुरा भईसकेको जानकारी दिँदै अधिकृत श्रेष्ठले भने, ‘अभियानका लागि बाँकेमा हाल सम्म ३० हजार ८ सय भाईल खोप प्राप्त भईसकेको छ । बाँकी तीन दिन भित्र आईपुग्छ ।’

२४३ वटा खोप केन्द्रमा २४३ जना स्वास्थ्यकर्मी र ४८६ जना शिक्षक तथा स्वयंसेवक परिचालन गरिने उनले बताए । बाँकेका ८ वटै पालिकामा जेठ १३ गते एकैसाथ खोप अभियान सञ्चालन गरेर १८ गते भित्र लक्षित वालवालिकालाई खोप लगाईसक्ने अधिकृत श्रेष्ठको दाबी छ ।

खोप केन्द्रमा खोप लगाउन छुटेका वालवालिकालाई पनि जेठ २४ गते भित्र खोप लगाई सकिने र २६ गते मूल्यांकन सहित अभियान समापन गरिने उनले बताए । जिल्ला स्तरीय अभिमुखिकरण तथा योजना तर्जुमा गोष्ठीमा सम्बोधन गर्दै जिल्ला समन्वय समिती बाँककेका अध्यक्ष ज्ञानेन्द्र कुमार चौधरी, नेपालगञ्ज उपमहानगरपालिकाका मेयर प्रशान्त विष्ट र बाँकेका प्रमुख जिल्ला अधिकारी खगेन्द्र रिजालले अभियानलाई सफल पार्न जिल्ला स्थित सबै सरोकारवाला पक्षलाई आग्रह गरे ।