खोज

नेपालगञ्ज, ७ जेठ ।

कुकुरले मानिसलाई टोकेका घट्ना बढ्न थालेपछि नेपालगञ्जमा सामुदायिक कुकुरहरुको बन्ध्याकरण सुरु गरिएको छ । दैनिकजसो कुकुरले टोकेर भेरी अस्पताल पुग्नेहरु बढ्दै गएपछि कुकुरको संख्या घटाउन नेपालगन्ज उपमहानगरपालिकाले सामुदायिक कुकुरको बन्ध्याकरण सुरु गरेको हो ।

नेपालगञ्ज उपमहानगरपालिकाकी पशु शाखा प्रमुख लक्ष्मी शाहीका अनुसार नेपालगन्जमा कुकुरले टोकेर हुने रेबिजको जोखिम बढ्दै जाँदा कुकुरको बढ्दो संख्या घटाउन उपमहानगरले सामुदायिक कुकुरको बन्ध्याकरण सुरु गरेको हो । जेठ ४ गतेबाट सञ्चालित बन्ध्याकरण शिविरबाट हालसम्म एक सय बढी सामुदायिक कुकुरको बन्ध्याकरण गरिएको पशु शाखा प्रमुख शाहीले बताईन् । उनले भनिन्, “सामुदायिक कुकुरको संख्याका साथै रेबिज न्यूनीकरणका लागि यो अभियान सञ्चालन गरेका हौँ ।”

नेपालगन्ज उपमहानगरपालिकाको २३ वटा वडामा २३० सामुदायिक कुकुरको बन्ध्याकरण गर्ने लक्ष्य राखिएको उपमहानगरको पशु शाखाले जनाएको छ । पशु सेवा शाखाको आयोजना एवम् होराइजन भेट क्लिनिक एण्ड पेट सप नेपालगञ्जसँगको सहकार्यमा संचालित शिविर जेठ ८ गतेसम्म चल्ने नेपालगञ्ज उपमहानगरपालिकाले जनाएको छ । शिविरमा होराइजन भेटक्लिनिकका डा. शिव भुसाल र डा. सुरज थारु नेतृत्वको ४ जना डाक्टर तथा ३ जना प्रविधिक टोलीले बन्ध्याकरण गरिरहेको पशु शाखा प्रमुख शाहीले जानकारी दिइन् । उनका अनुसार समुदायबाट कुकुर छोप्न ४ जना डग क्याचर परिचालन गरिएका छन् । पशु चिकित्सक सुरज चौधरीले पशु अधिकारका विरुद्धमा बन्ध्याकरण नभएको उल्लेख गर्दै सामुदायिक कुकुरको बढ्दो क्रमलाई घटाउनु यसको उद्देश्य रहेको बताए ।

उनले रेबिजसँगै अन्य विभिन्न रोगको सङ्क्रमणबाट मानिसलाई जोगाउन पनि बन्ध्याकरण आवश्यक भएकाले यो अभियान सञ्चालन गरिएको प्रष्टपारे । पशु चिकित्सक चौधरीले बन्ध्याकरण भएपछि कुकुरले टोक्ने वा भुक्ने काम कम गर्ने जानकारी दिँदै कुकुर शान्त स्वभावको हुने बताए । नेपालगन्जमा केही दिनयता निरन्तर भइरहेको विद्युत अनियमितताले बन्ध्याकरणमा समस्या भइरहेको उनको भनाइ छ । कुकुरको बन्ध्याकरण गर्नुअघि उसलाई सुई लगाएर बेहोस् बनाइने पशु विज्ञको भनाइ छ । सो बन्ध्याकरण अभियानका लागि छ लाख भन्दा बढी खर्च हुने बताइएको छ । सामुदायिक कुकुरको संख्या घटाउने, रेविज रोगको संक्रमण न्यूनीकरणमा मद्दत गर्ने, कुकुरबाट मानिस र अन्य जनावरमा सर्ने विभिन्न रोगहरुको संक्रमण कम गर्ने तथा सामुदायिक कुकुरलाई शान्त बनाउने उद्देश्यका साथ प्रत्येक वर्ष बन्ध्याकरण शिविर चलाउँदै आएको शाहीको भनाई छ ।