खोज

भैरहवा, ७ जेठ ।

नेपाली कांग्रेस क्षेत्र नम्बर ३, रूपन्देहीको नियमित बैठक तथा अवलोकन भ्रमण कार्यक्रम स्याङ्जाको आँधीखोला गाउँपालिका–१ स्थित नेपालको पहिलो होमस्टे ‘सिरुबारी सामुदायिक होमस्टे’ मा सम्पन्न भएको छ ।

आन्तरिक पर्यटनलाई प्रवद्र्धन तथा गुरुङ्ग संस्कृतिको अध्ययन, अवलोकन गर्नुका साथै नयाँ ठाउँ र परिवेशमा पार्टीलाई र संगठन सुदृढीकरण गर्ने उद्देश्यले बैठक तथा भ्रमण कार्यक्रम गरिएको कांग्रेस क्षेत्रीय सभापति सुशील गुरुङ्गले बताए । उनले भने, ‘संगठन निर्माण तथा पार्टीमा आम कार्यकर्ताको मनोबल र आत्मविश्वासको अभिवृद्धि गर्ने उद्देश्यले यो कार्यक्रम आयोजना गरेका हौं ।’

क्षेत्रीय सभापति सुशील गुरुङ्गका अनुसार बैठकमा पदाधिकारी तथा सदस्यहरु गरी २१ जनाको सहभागिता रहेको थियो ।

सिरुबारी सामुदायिक होमस्टेको विकास, विस्तार तथा निरन्तरताका लागि क्षेत्रीय समिति परिवारका तर्फबाट नगद ५ हजार १ सय ५ रुपैयाँ सहयोगस्वरुप होमस्टे व्यवस्थापन समितिका सचिव सुनिता गुरुङ्गलाई हस्तान्तरण गरिएको थियो ।

त्यस्तै बैठकले २०७४ सालमा सम्पन्न प्रदेश सभा सदस्य निर्वाचनमा पार्टीका आधिकारिक उम्मेदवारविरुद्ध बागी उम्मेदवार ओम कुमार श्रेष्ठ, उनका प्रस्तावक नारायण बहादुर कार्की र समर्थक रहेका राजेश जि.सी.लाई अनुशासनको कारवाही फुकुवा र क्रियाशील सदस्यता नविकरण गर्न माथिल्लो निकायमा सिफारिस गर्ने निर्णय गरेको कांग्रेस रुपन्देही क्षेत्र नम्बर ३ ले जनाएको छ ।

२०७९ मा सम्पन्न स्थानीय तह, प्रतिनिधि सभा एवं प्रदेशसभा सदस्य निर्वाचनमा पार्टीले प्रस्तुत गरेका उम्मेदवारहरुलाई विजय बनाउन गरेको साथ–सहयोगको मूल्यांकन गर्दै तीनैजनालाई अनुशासनको कारवाही फुकुवा र क्रियाशील सदस्यता नविकरण गर्न माथिल्लो निकायमा सिफारिस गर्ने निर्णय समेत गरिएको पार्टीले जनाएको छ ।