खोज

दाङ, ६ जेठ । नेकपा एमाले दाङको अधिवेशनमा पार्टी महासचिव शंकर पोखरेलका  बहिनी ज्वाई शिवकुमार आचार्यलाई अध्यक्षमा सर्वसम्मत गराउन प्रस्ताव गरिएको छ । पुर्व प्रदेश कमिटी सदस्य आचार्य महासचिव पोखरेलकी बहिनी एवं समानुपातिकबाट प्रतिनिधि सभा सदस्य बनेकी मेनका पोखरेलका श्रीमान् हुन् ।

दाङ महासचिव पोखरेलको गृह जिल्ला हो । उपाध्यक्षमा धुपनारायण चौधरी, सचिवमा मनोहर बुढाथोकी, उपसचिवमा मानबहादुर रावत र महिला उपसचिवमा हुमा डिसीलाई सर्वसम्मत गराउने प्रस्ताव छ ।

सर्वसम्मत नेतृत्व चयनका लागि जिल्लामा रहेका पोलिटब्युरो देखि केन्द्रीय सदस्यले कसरत गरिरहेका छन् । नेतृत्व चयनको जिम्मा पोलिटब्युरो सदस्य नरूलाल चौधरी र केन्द्रीय सदस्य घनश्याम पाण्डेलाई दिइएको छ । उनीहरूले पदाधिकारीको खाका बनाएर महासचिव पोखरेललाई बुझाएका छन् ।  यसमा सबै केन्द्रीय सदस्यले सहमति जनाएका छन् ।

तर, सचिवमा प्रस्तावित बुढाथोकीले अध्यक्ष नछाड्ने अडानमा छन् । यदि बुढाथोकीले अध्यक्ष नछाडेमा उनीसँग वर्तमान अध्यक्ष हुकुम बस्नेतलाई चुनाव लडाउने तयारी गरिएको छ। अधिवेशनमा ८ सय प्रतिनिधि सहभागी छन् । अधिवेशनको उद्घाटन महासचिव पोखरेलले गरेका छन् ।