खोज

बुटवल, ५ जेठ । बुटवलमा जारी उजिरसिह वडा कप २०८१ अन्तरगत शनिबार भएको खेलमा वडा नं. १० र ११ विजयी भएसंगै सेमीफाईनलका अन्तिम चार टिमको टुगो लागेको छ । बुटवल उपमहानगरपालिकाको आर्थिक सहयोगमा बुटवल क्रिकेट विकास समितिको आयोजनामा जारी प्रतियोगिताको पहिलो खेलमा वडा नं. १० ले वडा नं. १४ लाई ७२ रन तथा वडा नं. ११ ले वडा नं. १३ लाई ८८ रनले पराजित गरेको हो । यसअघि शुक्रबार भएको खेलमा वडा नं ३ र वडा नं. १ विजयी हुदै अन्तिम चारमा स्थान बनाएका थिए । सेमीफाईनलका दुई खेल आईतबार हुने छ । पहिलो सेमीफाईनल खेलमा वडा नं. १० ले वडा नं. ३ तथा दोस्रो सेमीफाईनल खेलमा वडा नं. १ ले वडा नं. ११ खेल्ने समितिका अध्यक्ष रोमित बज्राचार्यले बताए ।

नहरपुर माबिस्थित मैदानमा भएको खेलमा टस जितेर वडा नं. १० ले निर्धारित १६ ओभरमा १३४ रनको योगफल तयार गरेको थियो । उसका लागि सुजित श्रेष्ठले ३५ बलमा ४४ तथा युवराज रानाले १२ बलमा ३६ रनको योगदान दिए । वडा नं. १४ का सफल खत्रीले ४ तथा भुवन पराजुली र सुधन अर्यालले समान २—२ बिकेट लिए । वडा नं. १४ भने १३.५ ओभरमा केवल ६२ रनमा समेटियो । उसका लागि सफल खत्रीले २२ बलमा २८ तथा सुशान्त केसीले १५ बलमा १९ रनको योगदान दिए । कम स्कोरमा रोक्न वडा नं. १० का तौसिफ आलमले ५ तथा सुधन श्रेष्ठले २ बिकेट लिए । खेलमा वडा नं १० का तौसिफ आलम प्लयेर अफ दी म्याचबाट पुरस्कृत भए ।

यसैगरि दोस्रो खेलमा टस जितेर वडा नं. ११ ले निर्धारित १६ ओभरमा ९ बिकेट गुमाएर १५० रनको लक्ष्य खडा गरेको थियो । उसका लागि बिशाल भुषालले ३५ बलमा शानदार अर्धसतकिय ६२ रनको पारी खेले । दिप्सन क्षेत्रीले २५ बलमा ३८ रन बनाए । वडा नं. १३ का गुन्जन पोखरेलले ४ तथा दीपेन्द्र कुर्मीले २ बिकेट लिए । मध्यम लक्ष्य पछ्याएको वडा नं. १३ का ब्याट्सम्यानहरु ११.५ ओभरमा केवल ६३ रनमा समेटियो । उसका लागि गुन्जन पौडेलले ११ बलमा १५ तथा दीपेन्द्र कुर्मीले ९ बलमा ११ रनबाहेक अन्य ब्याट्सम्यानले दोहोरो रन जोड्न सकेनन । कम स्कोरमा रोक्न वडा नं. ११ का सन्तोष परियारले ३ तथा बिशाल भुषालले २ बिकेट लिए । वडा नं. ११ का बिशाल भुषाल प्लेयर अफ दी म्याचबाट पुरस्कृत भए ।