खोज

काठमाडौं,२ जेठ । जनता समाजवादी पार्टी जसपा नेपालले प्रधानमन्त्री पुष्पकमल दाहाल प्रचण्डले सरकार टिकाउनकै लागि आफ्नो पार्टी फुटाएको निष्कर्ष निकालेको छ।

मङ्गलवार बसेको केन्द्रीय समितिको बैठकले पार्टी विभाजन गर्नेहरूको तल्लो तहसम्म भण्डाफोर गर्ने निर्णय गरेको प्रवक्ता मनिष सुमनले बताए।

उनले पार्टी विभाजनको पक्षमा हस्ताक्षर गर्ने ७ सांसदसहित साथ दिने सबैलाई पार्टीको साधारण सदस्य समेत नरहने गरी निष्कासन गरेको बताए। बैठकमा बोल्ने ७० जनाभन्दा धेरै नेताहरूले प्रधानमन्त्री प्रचण्ड र एमाले अध्यक्ष ओलीले नै पार्टी फुटाएको धारणा राखेको सुनाए।

प्रचण्डले सिन्धुली पुगेर भाषण गर्दा आफैँले जसपा नेपाल फुटालिदिएको स्वीकार गरेको विषय वैठकमा नेताहरुले उठाएका थिए ।

वैठकमा अध्यक्ष उपेन्द्र यादवले चार दल सम्मिलित समाजवादी मोर्चाको अब कुनै औचित्य नभएको बताए।

प्रवक्ता सुमनले मोर्चामा बस्ने बस्नेहरूले नै एकले अर्काविरुद्ध प्रयोग गर्ने भएपछि त्यसको कुनै अर्थ नभएको अध्यक्ष यादवले भनेको बताए ।

यस्तै, बैठकले पार्टी विभाजन भए पनि महाधिवेशनको प्रक्रिया नरोक्ने निर्णय भएको बताए।

जसपाको महाधिवेशन जेठ २८ देखि ३० गतेसम्म हुँदैछ। पार्टी महाधिवेशनतर्फ अग्रसर भइरहेको बेलामा गत साता अशोक राई नेतृत्वमा जसपा नेपाल विभाजित भएर जसपा गठन भएको छ।

पार्टी विभाजनलाई मान्यता दिने निर्वाचन आयोगको निर्णयविरुद्ध उपेन्द्र यादव अदालतसमेत गएका छन्। त्यसको आज सुनुवाइ भइरहेको छ।