खोज

बुटवल, १ जेठ ।

नेपाल मगर महिला संघ लुम्बिनी प्रदेश समितिले वैज्ञानिक डा. महावीर पुनलाई ८ लाख ५३ हजार ७५० रूपियाँ हस्तान्तरण गरेको छ ।

विरगंज स्थित कृषि औजार कारखाना सञ्चालनका लागि सहयोग रकम जुटाउने उद्देश्यले वैज्ञानिक पुनद्वारा लिखित किताब बिक्री वितरणबाट प्राप्त भएको सो रकम मंगलबार रूपन्देहीको योगिकुटीमा आयोजित एक कार्यक्रमकाबिच हस्तान्तरण गरिएको हो ।

सो अवसरमा नेपाल मगर महिला संघ लुम्बिनी प्रदेश अध्यक्ष केशरी तरामुले संघको प्रदेश समिति मार्फत बिक्री भएको ७ लाख ५३ हजार ७५० रूपियाँ र जिल्ला अध्यक्ष निर्मला थापाले एक लाख रूपियाँ वैज्ञानिक पुनलाई हस्तान्तरण गरेका हुन् ।

कार्यक्रममा वैज्ञानिक पुनले सरकार र राष्ट्रिय आविष्कार केन्द्रबिच बन्द अवस्थामा रहेको बिरगंजको कृषि औजार कारखाना सञ्चालन गर्ने सम्झौतापछि ११ महिना लगाएर मर्मत सम्भार गरेर सञ्चालन योग्य बनाए पनि उत्पादनका लागि सरकारले रकम उपलब्ध नगराएपछि किताब प्रकाशित गर्ने र किताब बिक्री वितरणबाट रकम जुटाउने अभियानमा लागेको जानकारी गराए ।

यो किताब किनेर सिरानमा राख्ने नभई आफुले पढेर अरूलाई पनि पढ्न लगाउन आग्रह । कृषि औजार कारखाना सञ्चालनका लागि सहयोग रकम जुटाउनुका अलावा युवाहरूमा देशका लागि केही गरौे भन्ने भावनाको विकास गराउने उद्देश्यले पनि किताब प्रकाशित गरिएको उनले बताए ।

किताब पढेपछि युवाहरूमा केही गर्नका लागि संघर्ष गर्नुपर्छ भन्ने भावनाको विकास हुने विश्वास ब्यक्त गर्दै पुनले आफुले किताब किनि अरूलाई पनि किताब किन्न लगाउन आग्रह गरे ।

अभियान सञ्चालन गरेको १११ औं दिनमा तीन प्रदेशका २८ जिल्लासम्म आइपुग्दा हालसम्म ८८ हजार बढी किताब बिक्री भएको बताउँदै उनले तत्कालका लागि साना साना किसानलाई काम लाग्ने खालका र बलियो औजार बनाउने तयारी भइरहेको जानकारी गराए ।

आफुहरू किताब बिक्री वितरण अभियानमा लागे पनि अन्य टोली कस्ता औजार बनाउने भन्ने बिषयमा अनुसन्धानमा जुटेको उनले बताए ।

कार्यक्रममा ब्यक्तिगत रूपमै एक लाख मुल्य बराबरको किताब किनेर सहयोग गरेका राष्ट्रिय जनमुक्ति पार्टीका लुम्बिनी प्रदेश अध्यक्ष झमबहादुर गुरूङले वैज्ञानिक डा. महावीर पुन देशकै गहना भएको भन्दै उनको अभियानमा सबैले सहयोग गर्नुपर्नेमा जोड दिए ।

नेपाल मगर महिला संघ लुम्बिनी प्रदेश अध्यक्ष तरामुले रूपन्देही जिल्लामा मात्रै हालसम्म १२ हजार ७०४ किताब बिक्री वितरण भई ९५ लाख २८ हजार रूपयाँ संकलन भएको जानकारी गराउँदै रूपन्देहीबाटै एक करोडको किताब बिक्री हुने विश्वास ब्यक्त गरिन् ।

अभियानको सुरुमा रूपन्देहीमा १० हजार किताब बिक्री गर्ने लक्ष्य लिएकोमा हालसम्म १२ हजार ७०४ किताब बिक्री भइसकेको भन्दै उनले यस्तै क्रम जारी रहे रूपन्देहीबाट एक करोडको किताब बिक्री हुने विश्वास ब्यक्त गरिन् ।

नेपाल मगर महिला संघ तिलोत्तमाकि अध्यक्ष राधिका श्रीसले आज बुटवल उपमहानगरपालिका वडा नं १५ को सेमलार, बुटवकै हिलपार्कमा किताब बिक्री वितरण गरी वैज्ञानिक डा महावीर पुन आजै रूपन्देहीको देवदह गएको जानकारी दिइन् । कार्यक्रममा ४÷९ जिआरका पुर्व सैनिकहरूले २५ थान किताब खरिद गरेका थिए ।