खोज

देउखुरी, १ जेठ

दाङको राजपुर गाउँपालिका वडा नम्बर ७ स्थित मावि सिक्टाका प्रधानाध्यापक बिष्णु खत्रीलाई वडा सदस्य प्रमोद बस्नेतले कुटपिट गरेका छन् ।

राजपुर गाउँपालिका वडा नम्बर ७ का वडा सदस्य प्रमोद बस्नेतले मावि सिक्टाका प्रधानाध्यापक विष्णु खत्री र वडाध्यक्ष पुष्कर वली सोमबार वडा कार्यालयमा शिक्षा सम्बन्धी विषयमा छलफल गरिरहेका बेला एक्कासी आफुमाथि कुटपिट गरेको प्रधानाध्यापक विष्णु खत्रीले जानकारी दिए ।

प्रधानाध्यापक खत्रीले भने,–‘विद्यालयको विषयमा वडाध्यक्षसंग छलफल भइरहेको थियोे । वडा सदस्य प्रमोद बस्नेत वडा कार्यालयमा प्रवेश गर्नुभयो । लगत्तै स्कुलमा नाम लेखाउने विषयमा किन शुल्क उठाएको प्रश्न गर्नुभयो’, उनले भने, ‘त्यसपछि मैले गाउँपालिका चारवटा शिक्षक पठाउने निर्णय भएतापनि नपठाएको र विद्यार्थीबाट शुल्क नउठाएर विद्यालय कसरी संचालन गर्ने भन्ने बित्तिकै वडा सदस्य बस्नेतले राहतको शिक्षक भएर प्रधानाध्यापक बन्ने अनि ठुला कुरा गर्ने भन्दै म माथि कुटपिट भयो ।’ उनले आँखा, टाउको र हातमा चोट लागेको जानकारी दिँदै, उपचारको लागि राप्ती स्वास्थ्य विज्ञान प्रतिष्ठानमा पुगेको बताए ।

यता प्रत्यक्षदर्शी राजपुर गाउँपालिका वडा नम्बर ७ का वडाध्यक्ष पुष्कर वलीले वडा सदस्यको मावि सिक्टाका प्रधानाध्यापक विष्णु खत्री र म बिच वडा कार्यालयमा शिक्षाको विषयमा छलफल भइरहेको बेला वडा सदस्य प्रमोद बस्नेतले कुटपिट गरेको जानकारी दिए । उनले वडा सदस्य बस्नेतले त्यसरी कुटपिट नगरी चित्त नबुझेको कुरा वडामा आएर छलफल गर्न जरुरी रहेको बताए । उनले भने, ‘जनताको प्रतिनिधि भएर विद्यालयको प्रधानाध्यापक माथि कुटपिट गर्नु उहाँको नैतिकताले दिँदैन । यो सरासर उहाँले गलत गर्नुभएको हो । चित्त नबुझे गाउँपालिका छ, शिक्षा समिति छ, यसरी शिक्षकमाथि हातपात गर्न मिल्छ ?’

यता वडा सदस्य प्रमोद बस्नेतले प्रधानाध्यापक विष्णु खत्रीले आफूलाई मुख छोडेपछि हात छोड्न बाध्य भएको बताए । उनले गाउँपालिकाले निःशुल्क शिक्षा गर्दा गर्दै, तपाईंले किन शुल्क उठाउनु भएको भन्दा त जाबो वडा सदस्यले भनेर मैले शुल्क नउठाउने, आपत्ति जनक शब्द प्रधानाध्यापक खत्रीले निकालेपछि आफू बाध्य भएर हातपात गरेको बताए । उनले भने,–“गाउँपालिकाले निःशुल्क शिक्षा लागु गरेको छ तर उहाँले विद्यार्थीसंग किन शुल्क उठाउने । मेरो प्रश्न यहाँ निर हो ।” उनी राजपुर गाउँपालिका वडा नम्बर ७ मा नेपाली काङ्ग्रेसका तर्फबाट निर्वाचित वडा सदस्य हुन् ।