खोज

बुटवल, २९ बैशाख । बुटवल नगर खेलकुद विकास समितिको आयोजनामा सम्पन्न अन्तर पालिका स्तरीय उपमेयर कप प्रथम महिला भलिबल प्रतियोगिताको उपाधि बुटवल उपमहानगरपालिका टिमले चुमेको छ । शनिबार भएको फाईनलमा तिलोत्तमा नगरपालिकाको टिमलाई ३–० को सेटमा पराजित गर्दै बुटवलले उपाधि चुमेको हो ।

उपाधिसंगै बुटवलले नगद ५० हजार रुपैया, कप, मेडल, प्रमाणपत्रबाट पुरस्कृत भयो। उपविजेता तिलोत्तमा नगद ३० हजार रुपैया, कप, मेडल, प्रमाणपत्रमा चित्त बुझायो। एकतर्फि खेलको पहिलो सेट बुटवलले २५–९ को अंकले जित्दै खेलमा अग्रता लिए । दोस्रो सेट २५–८ र तेस्रो सेट २५–१४ अंकको सेटमा जित निकाल्दै उपाधि हात पारेको हो ।

प्रतियोगितामा सर्वोत्कृष्ट खेलाडी मिना सुनार (बुटवल) भईन । उत्कृष्ट डिफेन्डर आश्मा चौधरी (तिलोत्तमा), उत्कृष्ट ब्लकर अनुषा चौधरी (बुटवल), उत्कृष्ट स्पाईकर निसा चौधरी (बुटवल), उत्कृष्ट सर्भर रोजी थापा (तिलोत्तमा), उत्कृष्ट सेटर अनुषा चौधरी (बुटवल) बाट पुरस्कृत भईन । प्रतियोगितामा गैडहवा तेस्रो हुदै २० हजार रुपैया, कप, मेडल, प्रमाणपत्र तथा शुद्घोधन सान्त्वना हुदै नगद १० हजार रुपैया, कप, मेडल, प्रमाणपत्रबाट पुरस्कृत भए ।

कार्यक्रमका विजेता, उपविजेता, उत्कृष्ट खेलाडीहरुलाई बुटवल उपमहानगरपालिकाका नगरप्रमुख खेलराज पाण्डेय, उपमेयर सावित्रादेवि अर्याल, प्रमुख प्रशासकिय अधिकृत मित्रमणी खनाल, नगर खेलकुद समितिका संयोजक बोनिन पिया, नेपाल पत्रकार महासंघ रुपन्देहीका उपाध्यक्ष विश्वास ढकाल, खेलकुद पत्रकार मंचका अध्यक्ष सुमन अधिकारी, बुटवल उपमहानगरपालिकाका प्रवक्ता शिव रानाले पुरस्कार वितरण गरेका छन ।