खोज

बुटवल,२९ बैशाख । दिल्लीका मुख्यमन्त्री अरविन्द केजरीवालले प्रधानमन्त्री नरेन्द्र मोदीलाई लक्षित गर्र्दै देशलाई तानाशाहीबाट बचाउनुपर्ने बताएका छन् । शुक्रबार साँझ दिल्लीको तिहाड जेलबाट रिहा भएपछि आफ्ना हजारौं समर्थकलाई सम्बोधन गर्दै उनले हामी सबै मिलेर देशलाई तानाशाहीबाट बचाउनुपर्छ, म त तन, मन र धनले लडिरहेको छु, तानाशाहीविरुद्ध लडिरहेको छु, तर १४० करोड जनताले तानाशाहीविरुद्ध लड्नुपर्छ भने ।

सर्वोच्च अदालतले धरौटीमा रिहा गर्न अन्तरिम आदेश दिएपछि ५० दिनदेखि तिहाड जेलमा रहेका उनी रिहा भएका हुन् ।
उनी जेलबाट निस्किँदा जेलको ताला फुटे, केजरीवाल छाडे भन्ने नारा लगाउँदै ठूलो संख्यामा समर्थकहरू भेला भएका थिए।

रिहा हुनासाथ केजरीवालले मैले छिट्टै आउँछु भनेको थिएँ, म आएँ। सबैभन्दा पहिले म हनुमानजीको चरणमा पूजा गर्न चाहन्छु, हनुमानजीको आशीर्वादले आज म तपाईंहरू सबैको बीचमा छु भने ।
केजरीवालले सबैलाई धन्यवाद दिंदै देशका करोडौँ मानिसहरूले प्रार्थना र आशीर्वाद पठाएका भन्दै सर्वोच्च अदालतका न्यायाधीशहरूलाई धन्यवाद दिए ।
अरविन्द केजरीवालले शनिबार दिल्लीको कनाट प्लेसमा रहेको हनुमान मन्दिरको दर्शन गरेका छन् ।
मदिरा नीति घोटाला प्रकरणमा मुख्यमन्त्री केजरीवाललाई मार्च २१ मा ईडीले पक्राउ गरेको थियो। रिहा भएपछि उनी चुनावी अभियानमा सहभागी हुन पाउने छन् ।