खोज

बुटवल, २८ वैशाख ।

बुटवल– १२ नयाँगाउँमा अवस्थित श्री स्वामीनारायण मुक्तिनाथ धाममा तीनदिने सरल पान्चायन पूजाविधि प्रशिक्षण सम्पन्न भएको छ ।

मुक्तिनाथ धामका पीठाधीश लोकानन्द महाराजको सान्निध्यमा श्री स्वामीनारायण मुक्तिनाथ नारीजगृति समूहको आयोजना एवं लुम्बिनी पूजासामग्री भण्डारको संयोजनमा २५,२६ र २७ गते संचालित प्रशिक्षणमा मानव अधिकार महिला एकल समूह, विभिन्न धार्मिक संघसंस्थाका प्रतिनिधिलगायत २०० जना प्रशिक्षार्थी सहभागी थिए ।

नेपालको मौलिक धर्मसंस्कृति, परम्परा एवं शास्त्रीय विधानयुक्त सरल पाञ्चायतन पूजाको प्रयोगात्मक विधिसहित सञ्चालन गरिएको प्रशिक्षणमा ज्योतिष जनार्दन न्यौपानेले वास्तुअनुसारको पूजास्थल, पाञ्चायन देवताको स्थापना विधि, आचार्य पं कुरेश पाण्डेले पूजाविधि एवं मन्त्रोच्चारण, सुन्दर भण्डारीले मूर्तिहरूको प्रामाणिकता तथा पूजासामग्रीका बारेमा प्रशिक्षण प्रदान गरेका थिए ।

समापन समारोहमा धामका पीठाधीश लोकानन्द महाराजजीको आशीर्वचनसँगै वडा नं. १२ का वडाध्यक्ष्य डिल्लीप्रसाद शर्मा, धामका अध्यक्ष बाबुराम महत लगायतले मन्तव्य राख्दै यस कार्यक्रमले धर्मसंस्कृति एवं पूजाविधिका बारेमा धेरै जानकारी प्राप्त भएको र यसप्रकारका प्रशिक्षणात्मक कार्यक्रमलाई निरन्तरता दिनुपर्नेमा जोड दिएका थिए । श्री स्वामीनारायण मुक्तिनाथ नारीजागृति समूहकी अध्यक्ष बिष्णु बोहोरा र गौरी शर्माले कार्यक्रमको महत्वका बारेमा प्रकाश पारेका थिए ।