खोज

बुटवल, २७ बैशाख । टाईटन जेट नेपाल यु–१४ टि ट्वान्टी च्याम्पियनसिपको उपाधि न्यु होराईजन माबिले चुमेको छ । विहिबार भएको फाईनलमा बुद्ध पब्लिक स्कुललाई ३ विकेटले पराजित गर्दै न्यु होराईजन माबिले उपाधि हात पारेको हो । उपाधिसंगै न्यु होराईजनले नगद २१ हजार रुपैया, ट्रफी, मेडल, प्रमाणपत्र हात पारेको छ । उपविजेता बुद्ध पब्लिक नगद ११ हजार रुपैया, ट्रफी, मेडल, प्रमाणपत्रमा चित्त बुझायो । यसैगरि बेष्ट्रनका बेष्ट बलर सुर्यान्स ज्ञवाली, बेष्ट ब्याट्सम्यान बुद्ध पब्लिका बिनय कार्की, प्लयेयर अफ दी सिरिज अरुण कुमार नाउ, शान्ति नमुनाका रिदम भट्टराई ईमेरजिङ प्लेयरबाट पुरस्कृत भए ।

नहरपुर माबिको खेल मैदानमा भएको खेलमा टस जित्दै बुद्ध पब्लिकले निर्धारित २० ओभरमा ६ बिकेट गुमाएर ७८ रनको लक्ष्य खडा गरेको थियो । क्रिश केसीले नटआउट २६ बलमा १४, बिनय कार्कि २३ बलमा २० रन बनाए । न्यु होराईजनका कृष्ण पन्थीले ४ तथा अरुण कुमार नाउले ३ विकेट लिए । झिनो लक्ष्य पछ्याएको न्यु होराईजनले १३ ओभरमा ७ विकेटको नोक्सानीमा भेटायो । न्यु होराईजनका सफल भट्टराईले १४ बलमा १६, अनिस भट्टराई ३० बलमा २१ रन नटआउट तथा अमित यादवले ११ बलमा २३ रनको योगदान दिए । बुद्ध पब्लिकका रोशन कुवरले ३ विकेट लिए । खेलमा कृष्ण पन्थी प्लेयर अफ दी म्याचबाट पुरस्कृत भए ।

एक समारोहका बिच बुटवल उपमहानगरपालिकाका नगरप्रमुख खेलराज पाण्डेय, लुम्बिनी क्रिकेट संघका अध्यक्ष संजय गुरुङ, निवर्तमान क्यानका कार्यबाहक सचिव प्रशान्त विक्रम मल्ल, नहरपुर माबिका प्रधानाध्यापक धनिश्वार गौतम, नेपाल पत्रकार महासंघका उपाध्यक्ष विश्वास ढकाल, खेलकुद पत्रकार मंचका अध्यक्ष सुमन अधिकारी, रुपन्देही क्रिकेट संघका कोषाध्यक्ष निरज खाड, पुर्व क्रिकेटर शक्ति गौचन, बुटवल क्रिकेट विकास समितिका अध्यक्ष रोमित बज्राचार्यले विजेता, उपविजेता र उत्कृष्ट खेलाडिहरुलाई पुरस्कार वितरण गरेका थिए ।
कार्यक्रममा बुटवल उपमहानगरपालिकाका नगरप्रमुख खेलराज पाण्डेयले बुटवलबाट प्रतिनिधित्व गर्ने खेलाडी भनेको यहाको सेरोफेरोका धेरै जिल्लाको प्रतिनिधित्व गर्ने उनले बताए । विकासको मोडल खेलकुदलाई अघि बढाउन जरुरी रहेको उनले बताए । खेलकुद भनेको प्रतिस्प्रर्धाको विधा भएको भन्दै यसबाट आम नागरिकको जिवनलाई सिकाईको रुपमा रहेको उनले बताए । खेलाडीहरुलाई प्रोत्साहन हुने गरि कार्यक्रम अघि बढाउने उनले बताए ।

कार्यक्रममा लुम्बिनी क्रिकेट संघका अध्यक्ष संजय गुरुङले बुटवल क्रिकेट खेलाडी उत्पादनको खानी भएको बताए । बुटवलका खेलाडीहरु अभ्यासका लागि मैदान अभाव रहेको उनले बताए । बुटवल उपमहानगरपालिका क्रिकेट खेल मैदानमा जोड दिन आग्रह गर्दै उनले ६० यार्डको बाउण्ड्रीसहितको मैदानसम्म निर्माण गर्न सुझाव दिए ।

प्रतियोगिताका संयोजक विष्णु पाण्डेले एकेडेमीको स्थापनाकालमा भुवन पाण्डे, राहुल बिकबाट योगदान भएको बताए । ग्रासरुट खेल विकास र खेलाडी उत्पादन गर्न विभिन्न समयमा विशेष तालिम, प्रशिक्षण र प्रतियोगिताहरु गर्दै आएको उनले बताए । वेष्ट्रन क्रिकेट क्लबको आयोजनामा बैशाख २० गतेबाट शुरु भएको लिग चरणको प्रतियोगितामा आठ वटा टिम सहभागी रहेका थिए ।