खोज

बुटवल, २५ बैशाख । रुपन्देहीमा जारी टाईटन नेपाल जेट यु—१४ टिट्वान्टी क्रिकेट च्याम्पियनसिपमा अन्तिम चारको टुगो लागेको छ । लिग चरणको प्रतियोगिताबाट न्यु होराईजन स्कुल, वेष्ट्रन क्रिकेट क्लब, बुद्ध पब्लिक स्कुल र स्टार क्रिकेट एकेडेमीले अन्तिम चारमा स्थान बनाएका छन ।

सोमबार भएको खेलमा एमएसएमटी र स्टार क्रिकेट एकेडेमी विजयी भएको छन । बुटवल उपमहानगरपालिकाको सहयोग तथा वेष्ट्रन क्रिकेट क्लबको आयोजनामा सोमबार भएको पहिलो खेलमा एमएसएमटी एकेडेमी, नौतनहवाले होराईजन जिविएसलाई ७ बिकेट तथा स्टार क्रिकेट एकेडेमीले वेष्ट्रन क्रिकेट एकेडेमीलाई ६ बिकेटले पराजित गरेको हो ।

नहरपुर माविस्थित खेलमैदानमा भएको खेलमा टस जितेर होराईजन जिबिएसले १८.२ ओभरमा सबै बिकेट गुमाएर ९१ रनको लक्ष्य खडा गरेको थियो । होराईजनका हिमान्सु पाण्डेले ४४ बलमा २५ रनको नटआउट पारी खेले । यसैगरि चन्दन सिहले ११ बलमा १३ रनको योगदान गरे । एमएसएमटीका शहिद रजाले ४ तथा फुलचन प्रजापतिले ३ बिकेट लिए । झिनो लक्ष्यलाई एमएसएमटीले ८.५ ओभरमा ३ बिकेटको नोक्सानीमा भेटायो । खेलमा एमएसएमटीका शहिद रजा प्लेयर अफ दी म्याचबाट पुरस्कृत भए ।

यसैगरी दोस्रो खेलमा वेष्ट्रनले ब्याटिङ रोजेर ११.५ ओभरमा सबै बिकेट गुमाएर केवल ४४ रनको लक्ष्य खडा गरेको थियो । वेष्ट्रनका सचिन बास्तोलाले १२ बलमा १२ रनबाहेक अन्य कुनै ब्याट्सम्यानले दोहोरो रन जोड्न सकेनन । कम स्कोरमा रोक्न स्टारका दिपेन्द्र रेग्मीले शानदार ६ बिकेट लिए । स्टारले ७.२ ओभरमा ४ बिकेटको नोक्सानीमा जित निकाल्यो । स्टारका अमर बश्यालले १४ बलमा १७ रन तथा सम्राट राईले १३ बलमा १० रनको योगदान दिए । वेष्ट्रनका अर्पसन बिक्रम जिसीले २ बिकेट लिए । खेलमा स्टारका दिपेन्द्र रेग्मी प्लेयर अफ दी म्याचबाट पुरस्कृत भए ।