खोज

अर्घाखाँची, ३ वैशाख ।

लुम्बिनी प्रदेशका मुख्यमन्त्री जोखबहादुर महराले नेपालको शिक्षा प्रणाली शैक्षिक बेरोजगार उत्पादन गर्ने कम्पनी भएको टिप्पणी गरेका छन् । स्वदेशमा प्राप्त गरेको प्रमाणपत्रले विभिन्न क्षेत्रमा प्रतिस्पर्धा गर्न नसक्ने अवस्था सिर्जना हुनुले विदेश मोह बढेको महराको तर्क छ ।

अर्घाखाँचीको मालारानी गाउँपालिका वडा नं. ५ स्थित शान्ति माध्यमिक विद्यालयको हिरक महोत्सव कार्यक्रमको उद्घाटन गर्दै मुख्यमन्त्री महराले नेपालमा श्रमको मूल्य कमी भएकाले युवाहरू वैदेशिक श्रम बजारतर्फ आकर्षित भएको बताए । नेपालको श्रमको मूल्यले दैनिक गुजारा चलाउन नसक्ने समस्याले देश जनशक्ति विहीन हुँदै गएको बताउँदै मुख्यमन्त्री महराले श्रमको मूल्य बढाउन सकेमा नेपाली मात्र नभई विदेशी समेत आकर्षित हुनमा जोड दिए ।

त्यस्तै लुम्बिनी प्रदेशका मन्त्री चेतनारायण आचार्यले प्रदेश सरकारले जनतामा आशा जगाउने गरी काम गर्ने बताउँदै जनतामा छाएको निराशालाई आशामा परिणत गर्ने बताउँदै लुम्बिनीको विकासका लागि सबैले सहयोग गर्नुपर्नेमा जोड दिए ।

पूर्वराज्यमन्त्री सुशीला श्रीपाली, संघीय सांसद बिजुला रायमाझी, सन्धिखर्क नगरपालिकाका प्रमुख कृष्णप्रसाद श्रेष्ठ, मालारानी गाउँपालिकाका अध्यक्ष दल बहादुर भट्टराई, प्रमुख जिल्ला अधिकारी सुर्य बहादुर खत्री, पत्रकार महासंघ अर्घाखाँचीका अध्यक्ष अशोक खनाललगायतले मन्तव्य व्यक्त गरेका थिए । विद्यालय व्यवस्थापन समितिका अध्यक्ष चन्द्र बहादुर खड्काले विद्यालयको समग्र अवश्थाबारे चर्चा गरेका थिए । कार्यक्रममा विद्यालयका प्रअ मान बहादुर पाण्डेले प्रगति प्रतिवेदन प्रस्तुत गर्दै ‘६० वर्ष प्रवेशसँगै शान्ती माविले हीरक महोत्सव मनाएको बताएका थिए ।’