खोज

नवलपुर, २९ चैत ।

आगलागीको घट्ना र त्यसबाट हुन सक्ने धनजनको क्षति न्यूनिकरणका लागि नेपाल रेडक्रस सोसाईटीले सचेतना मुलक कार्यक्रम सञ्चालन गरेको छ । यसैबिच रेडक्रसले डिभिजन वन कार्यालय नवलपुरको सहकार्यमा आगलागी सम्बन्धी कृत्रिम घट्ना अभ्यास गरेको छ ।

अभ्यासमा वन कार्यालय, रेन्जर पोष्ट, प्रहरी, जुनियर युवा रेडक्रस स्वयम्सेवक, रेडक्रसकर्मी, स्वास्थ्यकर्मी, आमा समूह, क्लब, स्थानीय विपद न्यूनिकरण समितिका सदस्यहरु गरी १ सय ५० जना सहभागी थिए । अभ्यासमा आगलागी रोक्न गर्नुपर्ने भूमिका, आगलागी भएको बेलामा महत्वपूर्ण सामानहरुको जतन गर्ने तरिका, मानवीय क्षति न्यूनिकरणमा सरोकार वालाहरुले खेल्नुपर्ने भूमिकाका विषयमा अभ्यास गरिएको थियो ।

जापानिज रेडक्रस सोसाईटीको सहयोगमा रेडक्रस सोसाईटी नवलपुरले विनयी त्रिवेणीमा समुदायको अगुवाईमा विपद जोखिम न्यूनिकरण परियोजना ३ वर्ष देखि सञ्चाल गर्दै आईरहेको सोही परियोजना अन्तरगत आगलागी कृतिम घट्ना अभ्यास गरिएको उपसभापति उमा भुषालले जानकारी दिइन् ।

विनयी त्रिवेणी गाउंपालिका ७६ प्रतिशत वन क्षेत्रले ओगटेकोले आगलागीको उच्च जोखिम रहेको र यतिवेला खडेरीको समय पनि भएकाले यसलाई रोक्न, मानवीय र धनजनको क्षति न्यूनिकरण गर्न सवै एक जुट भएर लाग्न विनयी त्रिवेणी गाउंपालिकाका प्रमुख घनश्याम गिरीले आग्रह समेत गरेका छन् ।

डिभिजन वन कार्यालय नवलपुरका प्रमुख वसन्त केशव अधिकारीले नवलपुर आगलागीको जोखिम मध्ये नेपालकै सोह्रौं स्थानमा रहेकोले यसको रोकथामका लागि समुदायको सकृयताले मात्रै सम्भव हुने बताए । नवलपुरमा यस वर्ष एक दुई स्थानमा छिटफुट घट्ना वाहेक खासै ठूलो वन डढेलो आगलागी नभए पनि गर्मी शूरुवातसंगै जोखिम बढ्दै गएकाले सवै सरोेकारवालाहरु चनाखो भएर न्यूनिकरण अभियानमा जुटन डिएफओ अधिकारीले आग्रह गरेका छन् ।

विनयी त्रिवेणी गाउपालिकाका पुर्वप्रमुख डम्बर वहादुर जिसी, रेडक्रस सोसाईटी गण्डकी प्रदेश सदस्य रेखा अधिकारी, नवलपुरका कोषाध्यक्ष वेद प्रसाद न्यौपाने, उपमन्त्री निराजन चौधरी, जुनियर युवा रेडक्रस जिल्ला समिति संयोजक केबी राना, रेडक्रस जिल्ला सदस्य दुर्गा लक्ष्मी काफ्ले, परियोजना लेखा प्रशासन अधिकृत सुस्मिता आचार्य, रेडक्रसकर्मी शशिधर कंडेल, विनयी त्रिवेणी–४ का वडाअध्यक्ष साहिल श्रेष्ठ, पुर्वअध्यक्ष, गोपाल प्रसाद अधिकारी, वडा सदस्यहरु, मध्यविन्दु उद्योग बाणिज्य संघका वरिष्ठ उपाध्यक्ष चेतन प्रसाद पौडेल लगायतले समेत कृतिम घट्ना अभ्यासमा सहजीकरण तथा सहभागिता जनाएका थिए ।