खोज

नवलपुर, २१ चैत ।

तत्कालीन माओवादी द्वन्द्वमा क्षतिग्रस्त भएको जिल्लाको एक मात्र प्रहरी कार्यालय क्षतिग्रस्त भएको २१ वर्ष सम्म पनि पुनःनिर्माण हुन नसक्दा घरभाडामा लिएर प्रहरी कार्यालय चलाउनुपर्ने बाध्यता अझै कायमै रहेको छ ।

जिल्लाको हुप्सेकोट गाउँपालिकाको वडा नं. ५ रुद्रपुर धौवादीमा रहेको ईलाका प्रहरी कार्यालय २०३२ सालमा तत्कालीन प्रहरी महानिरीक्षक खडगजित बरालले स्थापना गरेका थिए । सो ईलाका प्रहरी कार्यालयले पहाडी दुई गाउँपालिका बुलिङटार र बौदीकाली, हुप्सेकोट गाउँपालिकाको वडा नं. ५ को शान्ति सुरक्षा देखि सबै क्षेत्रमा जनतालाई सेवा दिंदै आईरहेको थियो ।
्
सो ईलाका प्रहरी कार्यालय रुद्रपुर धौवादीमा कार्यरत प्रहरीहरु अहिले पनि वर्षौ देखि टेन्टमा रात बिताउन बाध्य छन् भने एउटा सानो छाप्रो घर भाडामा लिएर ईलाका प्रहरी कार्यालय संचालन हुँदै आएको हुप्सेकोट गाउँपालिका वडा नं. ५ का वडाध्यक्ष पदमबहादुर राना मगरले बताए ।

ईलाका प्रहरी कार्यालय रुद्रपुर धौवादीमा कार्यरत प्रहरी जवानदेखि प्रहरी नाउब निरीक्षक सम्मले २० बर्षदेखि त्रिपालमा चिसो हावामा रात बिताउन बाध्य हुँदा पनि अहिले सम्म सो प्रहरी कार्यालय पुनःनिर्माण हुन नसक्नु दुखको विषय भएको वडाध्यक्ष रानामगरले बताए ।

तत्कालीन माओवादी द्वन्द्वको समय २०५८ सालमा सो ईलाका प्रहरी कार्यालयमा माओवादी आक्रमण हुँदा भन क्षतिग्रस्त हुनुको साथै प्रहरी नायब निरीक्षक सहित चार प्रहरीले शाहादत प्राप्त गरेका थिए ।

द्वन्द्वमा क्षतिग्रस्त भएपछि जिल्ला प्रहरी कार्यालयमा गाभिएको सो ईलाका प्रहरी कार्यालय २०६३ मंसिर ५ को विस्तृत शान्ति सम्झौता पछि पुनः सोही ठाउँमा स्थानान्तरण भएको थियो र अहिले पनि रुद्रपुर धौवादीमा मासिक रु दुई हजार भाडा तिरेर ईलाका प्रहरी कार्यालय संचालन मा आएको छ भने त्यहाँ कार्यरत प्रहरीहरु कोठाको अभावमा त्रिपालमा सुत्न बाध्य छन् ।

जिल्ला प्रहरी कार्यालयका प्रमुख प्रहरी नरहरि रेग्मीले सडकको छेउँमा प्रहरीको जग्गा नभएको कारण भवन निर्माण हुन नसकेको र सडक छेउँछाउँमा जग्गा ब्यवस्थापन गर्न पहल भइरहेको वर्षौ बिते पनि हाल सम्म प्राप्त गर्न नसकिएकाले भवन भाडामा चलाउनुपरेको बताए ।