खोज

नेपालगञ्ज, २० चैत ।

बाँकेमा अबैधरुपमा भित्रिने भारतीय दुधका कारण नेपाली दुध बिक्रीमा समस्या भईरहेको दुग्ध ब्यावसायीहरुले बताएका छन् । भारतीय दुधको प्रतिस्प्रधा गर्न नसकेर कतिपय नेपाली कृषकहरु पाल्दै आएका भैंसी बेच्ने अवस्थामा पुगेको ब्यावसायीहरुको भनाई छ । भारतबाट दैनिक ६ हजार लिटर दुध अबैध रुपमा भित्रिरहेको दुग्ध ब्यावसायी संघ बाँकेका सचिव जिवस यादवको दावी छ ।

नेपालगन्ज र आसपासका बजारमा भारतबाट बिना रोकतोक दूध आएपछि नेपाली दूधको बजारमा असर गरेको जिल्ला दुग्ध व्यवसायी संघ बाँकेका अध्यक्ष दीपकराज भण्डारी बताउँछन् । उनका अनुसार बाँकेमा छिमेकी जिल्ला बर्दियाबाट पनि दूध आउँदा करिब ३८ हजार लिटर दूध दैनिक जम्मा हुन्छ । अन्य जिल्लामा पठाएर बाँकेमा खपत गर्दा पनि करिब ८ हजार लिटर दूध बढी हुने गरेको भण्डारी बताउँछन् ।

दुग्ध ब्यवसायीहरुले खुलमखुल्ला रुपमा भारतीय दुध भित्रिरहेको दाबी गरिरहँदा मंगलबार भारतबाट अवैधरुपमा नेपालगञ्ज ल्याउँदै गरेको अवस्थामा सशस्त्र प्रहरीले करिब ४ सय लिटर दुध बरामद गर्न सफल भएको छ । सिमानाकामा अनुगमनका क्रममा अबैध रुपमा नेपाल तर्फ ल्याउँदै गरेको १३ वटा टयांकमा राखिएको दुध बरामद गरिएको सशस्त्र प्रहरी वल भन्सार सुरक्षा गुल्मका सशस्त्र प्रहरी नायव उपरीक्षक अस्मिन थापाले बताए । बरामद गरिएको दुध हेर्न भन्सार कार्यालय नेपालगञ्ज पुगेका दुग्ध ब्यावसायी संघ बाँकेका सचिव यादवले दिउँसो दुई बजे सम्म पनि त्यो दुध ताजा जस्तो देखिनुमा अखाद्ध वस्तु मिसाईएको हुन सक्ने आशंका गरे । उनले भने ‘यो बरामद गरेको दुध दिउँसो २ बजे पकाएर हेर्दा पनि फाटेन, यसमा पक्कै मिसावट छ ।’ सस्तो मूल्यमा पाईने अखाद्य भारतीय दुधले मानिसको स्वाथ्यमा सिधै असर गर्न सक्ने बताउँदै सचिव यादवले उपभोक्ताहरुलाई अब सचेत हुन आग्रह गरे ।

दुग्ध ब्यवसायीहरुको अनुगमन टोलीले पनि बाँकेको बेतहनी क्षेत्रबाट मोटरसाइकलमा दूध तस्करी गर्नेलाई कैयौंपटक फेला पारको संघका अध्यक्ष भण्डारी बताउँछन् । भारतबाट दुध तस्कर गर्नेहरुको ठूलो सञ्जाल रहेको उनले त्रताए’ अध्यक्ष भण्डारीले भने –‘भारतीय नम्बर प्लेटको मोटरसाइकलमा एक पटकमा १३० लिटर दूध ल्याउने गरिएको छ, त्यसरी भित्रिएको दूध नेपाली विक्रेताले नै नेपालमै उत्पादित दूधसँग मिसाउँछन् अनि त्यो दूध बजारसम्म आइपुग्छ ।’ ‘कतिपय मोटरसाइकल त सिधै मिठाइ पसलदेखि व्यक्तिका घरसम्म पनि जाने गरेको पाइन्छ, तर तस्करीको सञ्जालबारे सरकारले आवश्यक अनुगमन गरेको छैन ।’ मंगलबार बरामद गरिएको दुध पशु क्वारिन्टनका प्राविधिकहरुको रोहबरमा नष्ट गरिएको सशस्त्र प्रहरी नायव उपरिक्षक थापाले जानकारी दिए ।