खोज

गैंडहवा, २० चैत ।

रुपन्देहीको गैडहवाका दुई युवाले व्यावसायिक तरकारी खेतीबाट मनग्य आम्दानी गर्न थालेका छन् । परिवारका सदस्यलाई साथमा लिएर उनीहरु व्यावसायिक तरकारी खेतीतर्फ लागेका हुन् ।

गैंडहवा गाउँपालिका वडा नं. ८ कोत्रहवा देविनगरमा शितल एकीकृत कृषि फार्म स्थापना गरेर उनीहरु व्यावसायिक खेती थालेका हुन् । केही समय अगाडि करिव १ बिगामा टमाटर खेती लगाएका मानबहादुर थापाले अहिले फेरि १० कट्ठामा काँक्रो खेती सुरु गरेका छन् । टमाटर खेतिबाट मनग्य आम्दानी गरेका उनले फेरि काँक्रो खेती सुरु गरेका हुन् । “९६ क्वीन्टल टमाटर बेचिसकें, अझै १५ क्वीन्टल फल्ने अनुमान छ”–थापाले भने ।

थापाले अहिले आफ्नो बारीमा २२ सय काँक्रोको बिरुवा लगाएका छन् । अहिले उनका छोरा हिरा बहादुर थापा सन्चाल र बुहारी सीता थापाले समेत घरमै केही गर्नुपर्छ भनेर सघाएको थापा बताउँछन् । “घरपरिवारका सबै सदस्यको सामूहिक मेहनतबाट तरकारी खेती फस्टाएको छ, हामी परिवारका सबैजना बिहानदेखि साँझसम्म नै खेतमा बिताउँछौं”–थापाले भने ।

गाउँपालिका र वडा कार्यालयले सहयोग गरेमा आफुलाई अझै तरकारी खेती गर्न हौसला मिल्ने थापा बताउँछन् । “सामान्य बिषादी पालिकाले उपलब्ध गराए राम्रो हुन्थ्यो, उत्पादन पनि बढाउन सकिन्थ्यो”–उनले भने । अहिले आफुले अर्गानिक तरकारी उत्पादन गरिरहेको थापाले बताए । “काँक्रो र टमाटरका साथमा अन्य तरकारी पनि उत्पादन गर्ने गरेका छौं”–थापाले भने । अब केही दिनमै काँक्रो तयारी हुने निर्देशक थापाले बताए ।