खोज

हुप्सेकोट, १९ चैत ।

कृषि क्षेत्रमा जनतालाई आत्मनिर्भर बनाउन जिल्लाको हुप्सेकोट गाउँपालिकाले उत्पादनका आधारमा अनुदान वितरण गर्ने नीतिलाई अगाडि बढाएपछि पालिकामा कृषक उत्साहित भएका छन् ।

गत आर्थिक वर्षमा दुधमा प्रतिलिटर रु पाँच अनुदान दिने नीति ल्याएको पालिकाले यो बर्ष मासुमा प्रतिकिलो १० रुपैयाँ अनुदान दिन शुरु गरेको छ । किसानलाई प्रोत्साहन गरी पालिकालाई दुध र मासु उत्पादनमा आत्मनिर्भर बनाउने उद्देश्यले अनुदान उपलब्ध गराइएको गाउँपालिकाले जनाएको छ । गाउँपालिकाका अध्यक्ष लक्ष्मीदेवी पाण्डेले उत्पादनका आधारमा अनुदान दिने नीतिअनुरूप आर्थिक वर्ष २०७८÷७९ देखि किसानलाई अनुदान दिन थालिएको र सहकारीमार्फत विक्री गरिएका खसीबोकामा प्रतिकिलो रु १० का दरले रकम उपलब्ध गराउने निर्णय गरिएको जानकारी दिईन् । उनका अनुसार गत आर्थिक वर्षमा प्रतिकिलो रु पाँच अनुदान दिइएको थियो ।

“किसानले पालेको खसीबोका सहकारी मार्फत विक्री गर्दा गत आर्थिक वर्षदेखि प्रतिकिलो पाँच रुपैयाँका दरले अनुदान दिन सुरु गरिएको थियो । यो वर्ष देखि प्रतिकिलो रु १० पु¥याएका छौँ”, उनले भनिन “स्थानीय उत्पादनमा आत्मनिर्भर बनाउनका लागि अनुदानको व्यवस्था गरिएको हो ।”

मासुमा अनुदान कार्यक्रम अन्तर्गत गत आर्थिक वर्ष २०७९÷८० मा ३५ हजार छ सय २४ किलो मासुमा पाँच रुपैयाँको दरले अनुदान रकम वितरण गरिएको गाउँपालिकाका प्रमुख प्रशासकीय अधिकृत टङ्कनाथ घिमिरेले बताए ।

“हुप्सेकोट सामाजिक महिला बहुउद्देश्यीय सहकारी मार्फत १६ हजार तीन किलो र लेकबेसी सामाजिक उद्यमी महिला सहकारी संस्था मार्फत १९ हजार छ सय २१ किलो मासुमा कुल एक लाख ७८ हजार एक सय २२ रुपैयाँ नगद अनुदान प्रदान गरिएको छ”, उनले भने ।

गाउँपालिकाले खसीबोकामा अनुदानको व्यवस्था ल्याएसँगै स्थानीय बासिन्दा खुसी भएका छन् । गाउँपालिका क्षेत्रमा दूध, तरकारी र मासुमा आत्मनिर्भर बनाउन अनुदानका माध्यमबाट युवालाई व्यावसायिक बनाउन थालिएको अध्यक्ष पाण्डेको भनाई छ ।

युवालाई व्यावसायिक बनाउन सकेको अवस्थामा गाउँपालिका दूध, तरकारी र मासुमा आत्मनिर्भर हुने गाउँपालिकाका अध्यक्ष पाण्डेले बताईन् । “गाउँपालिका क्षेत्रभित्रको पहाडी गाउँमा खसीबोकाको पालन धेरै हुने गरेको छ”, उनले भनिन्, “अनुदानका लागि सङ्घ संस्था, समूह तथा सहकारी मार्फत कारोबार गर्नेलाई मात्र अनुदान प्रदान गरिएको छ ।”

गाउँपालिकाले कृषि उत्पादन वृद्धि गर्ने उद्देश्यका साथ किसानलाई दुधमा प्रतिलिटर १० रुपैयाँ र भकारो सुधार कार्यक्रम अन्तर्गत अनुदान प्रदान गरिएको अध्यक्ष पाण्डेले बताइन् । गाउँपालिकाले यो बर्ष देखि किसानलाई मिल्कएनलाइजर, मिनि टेलर, मिल्क क्यानलगायतका कृषि औजारमा अनुदानका कार्यक्रम सञ्चालन गरेको छ । हुुप्सेकोट गाउँपालिकालाई कृषि मा पूुर्ण आत्मनिर्भर पालिका बनाउने उद्देश्यका साथ काम अगाडि बढेको उपाध्यक्ष पूर्णसिंह रानामगरले बताए ।