© २०२३
बुटवल, ११ चैत ।
राणा शासनको विरुद्ध लड्दा मृत्युवरण गरेको शुकदेव गुरुङलाई सरकारले सहिद घोषणा गर्न आनाकानी गरेको भन्दै सहिद घोषणा गर्न बिभिन्न राजनीतिक दलहरुले संयुक्त रुपमा माग गरेका छन् । शहीद चोक घोषणा र शुकदेव गुरुङ शहीद घोषणाको लागि राष्ट्रिय जागरण अभियानद्वारा सर्वपक्षीय सर्वदलीय १४७ औँ स्मृति सभाको अबसरमा सरकार समक्ष सहिद घोषणाको माग गरेका छन ।
तमु ह्युला छोजधी गुरुङ राष्ट्रिय परिषद् रुपन्देहीको संयुक्त आयोजनामा रुपन्देहीको भैरहवामा आयोजित कार्यक्रमलाई संबोधन गर्दै संघीय सरकारका नागरिक उड्डयन तथा पर्यटन मन्त्री हित बहादुर तामाङले सहिदहरु प्रति सधै उच्च सम्मानका साथ त्यो बेलाको तथ्य र प्रमाण हेरी सबै कागजात मिलाएर शहीद घोषणको बिषयलाई मन्त्रीपरिषदमा लैजाने र प्रधानमन्त्री समक्ष पनि प्रस्ताव गर्ने बताए ।
“कुनै बेला हामीले चाहने तर कर्मचारी संयन्त्रबाट नचाहने र हामी आफै पनि आवश्यक कागजात पुर्याउन नसकिरहेका हुन्छौ यस्ले गर्दा पनि हामी कुनै काम गर्न असक्षम हुन्छौ त्यसको लागी हामी कागजातमा पनि बलियो भएर सरकारलाई दवाव सृजना गरिरहनुपर्छ”– उनले भने । शहीद सुकदेव गुरुङलाई सहिद घोषण गर्ने बिषयमा राज्य तदारुकताका साथ लाग्ने प्रतिवद्धता व्यक्त गर्दै जनतहबाट पनि सरकारलाई घचघच्याउनु पर्ने बताए । मन्त्री तामाङले आफूले आफ्नो तहबाट सुकदेवलाई सहिद घोषणाको लागि गर्न सक्ने सहयोग गर्न तयार रहेको बताए ।
कार्यक्रममा मगर मुक्ति मोर्चा नेपाल रुपन्देहीका अध्यक्ष दान बहादुर घर्ती मगर, सहिद सुकदेव राष्ट्रिय कार्यदल नेपालका अध्यक्ष धन बहादुर गुरुङ ,आदिवासी जनजाति महासङ्घ लुम्बिनीका महासचिव मनोज राना, रुपन्देहीका उपाध्यक्ष इन्द्र राई, तमु ह्युला छोजधी गुरुङ राष्ट्रिय परिषद् रुपन्देहीका अध्यक्ष विमला गुरुङ लगायतले बोल्दै बिभिन्न राजनीतिक दलहरुका प्रतिनिधिहरुले जनजातिको बिषयमा सरकारले पनि बेवास्ता गरेको र जातिय मूल्याङ्कनमा पनि सरकारी संयन्त्र नभएको गुनासो गरेका थिए । सहिद सुकदेवलाई हाल सम्मका शासकहरूले वास्तविक इतिहास र बलिदानलाई पूर्वाग्रही दृष्टिकोणले हेरिनु र राष्ट्रका वीर वीरङ्गनाहरुलाई राज्यद्वारा अपहेलित गरेको उनीहरूको आरोप रहेको छ ।
वि.सं. १९३३ साल चैत्र १० गते जङ्गबहादुर राणाको शासन कालमा हत्या गरिएको थियो । राणा विरोधी आन्दोलनका क्रममा १८ वर्ष जेल जीवन बिताएका गुरुङलाई जेलभित्रै मारिएको थियो ।