खोज

बुटवल, ५ चैत ।

बुटवल उपमहानगरपालिकामा छाडा चौपायाको समस्या पुरानै हो । यहाँको छाडाचौपाया पक्रेर राख्न अस्थायी रुपमा हाटबजारस्थित कान्जी हाउस प्रयोग हुन्थ्यो । यही कान्जी हाउसमा अहिले सिद्धार्थ गौतम बुद्ध क्याम्पस संचालन भएको छ ।

सरकारी १० कट्टा क्षेत्रफलमा भोगाधिकार पाएर पूर्वाधार निर्माण भई संचालनमा रहेको कलेजले शैक्षिक उत्कृष्टता हासिल कलेजको दाबी गरेको छ । बुटवलको शैक्षिक इतिहासमा गुणस्तरीय शिक्षा प्रदान गर्ने गरी स्थापना भएको यो कलेज ३२ वर्षमा पुगेको छ । तत्कालीन समयमा ४२ जना संस्थापक प्राध्यापक र सदस्यहरुबाट २०४८ असोज २१ गते स्थापना भएको हो ।

संस्थापक अध्यक्षका रुपमा बालकृष्ण खाँड २०५५ सालसम्म रहेका थिए । त्यसपछि क्रमशः सुर्यप्रसाद प्रधान, २०७२ हिराप्रसाद श्रेष्ठ, २०७७ देखि निर्मल प्रसाद लाकौल अध्यक्ष रहेका छन् । कलेज ब्यवस्थापन समितिका अध्यक्ष निर्मल लाकौलले बुटवलमा शैक्षिक रुपमा गुणस्तरीय कलेज नभएको समयमा सिद्धार्थ क्याम्पस स्थापना भएको दाबी गरे । धेरै दक्ष जनशक्ति उत्पादन गर्न सफल भएको उनले बताए ।

अहिलेका नाम चलेका धेरै कलेज र विद्यालय नभएको बेला यहाँबाट राम्रो शिक्षा प्रदान गर्न सफल भएको उनले बताए । यसैबिच कलेजको स्थापना दिवसमा १० वटा अक्षयकोष घोषणाको तयारीमा रहेको उनले बताए । ‘यो छात्रवृत्ति अक्षयकोष १ करोड रुपैयाँ बराबर पुर्याउने लक्ष्य रहेको छ’—उनले भने । अक्षयकोषको रकमबाट गरिब तथा जेहेन्दार विद्यार्थीहरुलाई अध्यापन गराईने उनले बताए । चुनौतीका रुपमा विद्यार्थीहरुको न्युन उपस्थितिलाई चिर्ने गरी अघि बढेको उनले बताए ।

सिद्धार्थ गौतम बुद्ध क्याम्पसको ३२ औ वार्षिकोत्सवको तयारीमा रहेको क्याम्पस प्रमुख कृष्ण प्रसाद शर्माले बताए । विभिन्न उपसमिति गठन गरी वार्षिकोत्सव तयारी बैठक गरिएको उनले बताए । वार्षिकोत्सवको अवसरमा कलेज परिसरमा नवनिर्मित पुस्तकालय भवनको उद्घाटन गरिने उनले बताए । सभाहल र सेमिनार हल समेत निर्माण गरिएको भन्दै हललाई कलेजका पुर्वअध्यक्ष तथा समाजसेवी स्वर्गीय सुर्यप्रसाद प्रधानको नामबाट नामाकरण गरिएको बताए । पहिलो क्याम्पस प्रमुख जगत बहादुर पराजुली, १२ औ क्याम्पस प्रमुखका रुपमा आफु जिम्मेवारीमा आएको उनले बताए । राष्ट्रिय र अन्तर्राष्ट्रिय शिक्षा प्रदान गर्दै गुणस्तर र ब्यावहारिक ज्ञानलाई जोड दिइएको छ । क्युएए प्राप्त गरेको क्याम्पसले निरन्तर विद्यार्थी, अभिभावक र प्राध्यापक बिचको समन्वयलाई विशेष जोड दिएको छ । प्राध्यापकहरुको शैक्षिक उनयनमा जोड दिदै आएको उनले बताए ।

फागुन ३० देखि चैत ४ गतेसम्म खेलकुद र साहित्यिक कार्यक्रमहरु गरिएको उनले बताए । यसैगरी सोमबार कलेज परिसरमा बृहत् रक्तदान कार्यक्रम गरिएको उनले बताए ।

कार्यक्रममा नेपाल पत्रकार महासंघ रुपन्देहीका उपाध्यक्ष विश्वास ढकाल, प्रेस युनियनका सभापति कबिन्द्र नेपाल, प्रेस चौतारी नेपालका कोषाध्यक्ष दिनेश श्रेष्ठले शुभकामना दिएका थिए ।

शिक्षा, कला, ब्यवस्थापन विषय अध्यापन गराईने क्याम्पसमा ब्याचलर, मास्टरमा १२८०, प्लस टुमा ४३५ विद्यार्थी अध्ययरत छन् ।