खोज

सल्यान, ५ चैत । सल्यानमा कर्णाली प्रदेशको दोश्रो पञ्चवर्षीय योजना तर्जुमाका लागि कार्यशाला सम्पन्न भएको छ । कर्णाली प्रदेश योजना आयोगले जिल्ला स्थित सरोकारवालासंग छलफल तथा सुझाव संकलनका लागि एक दिने कार्यशाला सम्पन्न गरेको हो । जिल्ला समन्वय समितिको समन्वयमा भएको कार्यक्रममा विभिन्न समूह विभाजन गरी सुझावहरु संकलन गरिएको थियो ।

उत्पादनमुखी र रोजगारमूलक अर्थतन्त्र निर्माण गरी दिगो विकास, सुशासन र सामाजिक न्याय मार्फत समुन्नत कर्णाली निर्माण गर्ने लक्ष्यका साथ विविध उद्देश्यहरु प्राप्तीका लागि दोश्रो पञ्चवर्षीय योजना तर्जुमा गर्न लागिएको कर्णाली प्रदेश योजना आयोगले जनाएको छ । कार्यशालामा प्रदेश योजना आयोगका सदस्य जीत बहादुर शाहले पहिलो पञ्चवर्षीय योजनाको प्रगति र समीक्षा बारे प्रस्तुतीकरण गरेका थिए । प्रस्तुतीकरणमा उनले अनपेक्षित परिघटनाहरु, राजनीतिक अस्थीरता, संघीयताको सिकाई, परियोजना छनौट र कार्यान्वयनमा भएका कमजोरी, महत्वकांक्षि कार्यक्रम, संरचना तथा दक्ष जनशक्तिको अभाव लगाएतका कारणले प्रथम पञ्चवर्षीय योजना कार्यान्वयन अपेक्षा अनुसार हुन नसकेको निष्कर्ष सुनाएका थिए ।

कार्यक्रममा जिल्ला समन्वय समिति सल्यानका प्रमुख बेलाराम रावल, उपप्रमुख असवीर बुढाथोकी, छत्रेश्वरी गाउँपालिकाका अध्यक्ष ओज बहादुर बुढाथोकी, कुमाख गाउँपालिकाका अध्यक्ष मान बहादुर बुढाथोकी, त्रिवेणी गाउँपालिकाका अध्यक्ष खिम बहादुर रावत, कपुरकोट गाउँपालिकाका अध्यक्ष दुर्गा बहादुर पुन, प्रमुख जिल्ला अधिकारी शम्भु प्रसाद रेग्मी लगाएत स्थानीय तहका उपप्रमुखहरु, राजनीतिक दल, सुरक्षा निकाय, विभिन्न संघ संस्थाका प्रमुख प्रतिनिधी लगाएतले दोश्रो पञ्चवर्षीय योजना ९२०८१।०८२—२०८५।०८६० मा समेट्नुपर्ने विषयका सन्दर्भमा विभिन्न सुझाव दिएका थिए ।