खोज

सुनवल, २ चैत ।

पश्चिम नवलपरासी प्रहरीले सर्वश्व सहित जन्मकैदको सजाय सुनाईएका एक फरार अभियुक्तलाई १४ वर्षपछि पक्राउ गरेको छ । छिमेकीको हत्यापछि भारतमा लुकेर बस्दै आएका साविक गुठीसुर्यपुरा गा.वि.स ९ झुलनीपुर बस्ने वर्ष ५६ का नौमी प्रसाद राजभरलाई प्रहरीले बिहीबार राति पाल्हीनन्दनको महेशपुर नाकाबाट पक्राउ गरेको हो । राजभरले साथीहरुसंग मिलेर वि.सं. २०६६ साल असोजमा स्थानीय अरविन्द राजभरको हत्या गरेका थिए । सिमावर्ती भारतीय बजार ठुुटिबारीमा आफन्तको जग्गा किन्ने भन्दै नौमी प्रसाद सहित थप दुई जना व्यक्तिको साथमा अरविन्द राजभर घरबाट निस्किएका थिए । तर अरविन्द न त ठुटिबारी जग्गा किन्न पुगे न त घर नै फर्किए, खोज्दै जाने क्रममा उनको शव गण्डक विद्युत गृहको रेडियल गेटमा फेला परेको थियो ।

अनुसन्धानका क्रममा मृतक अरविन्दलाई नौमी प्रसादले ४ लाख रुपैयाँ जग्गा खरिदका लागि भन्दै लिएको र सोही पैसाकै लोभमा हत्या गरेको खुलेको थियो । ठुटिबारी नगई गाउँमै रहेको होटलमा मदिरा सेवन गरी उनको हत्या गरेको प्रहरी अनुसन्धानबाट खुलेको थियो । हत्यापछि फरार रहेका नौमी प्रसादले भारतको नयाँ दिल्लीमा परिचय लुकाई पेन्टिङ्गको काम गर्दै आएका थिए । उनले दिल्लीमा भारतीय आधार कार्ड बनाएर बस्ने गरेको र बेला बेलामा नेपाल आउने गरेकाले विशेष सूचनाको आधारमा नियन्त्रणमा लिईएको प्रहरीले जनाएको छ । राजभरको हत्याको समयमा नौमीप्रसाद ४२ वर्षका थिए हाल ५६ वर्ष पुगेका छन् ।

निजलाई शुक्रबारै जिल्ला अदालत परासीमा सजाय भुक्तानका लागि बुझाईएको जिल्ला प्रहरी कार्यालयका सूचना अधिकारी डिएसपी रेशम बोहोराले जानकारी दिए ।