खोज

बुटवल,१ चैत ।   नेपाल समाजवादी पार्टी नेसपाभित्र उत्पन्न विवाद उत्कर्षमा पुगेको छ । नेकपा माओवादी केन्द्रसँग पार्टी एकता गर्ने कि नगर्ने विषयमा विवाद चर्केको हो । नेसपाका अध्यक्ष डा बाबुराम भट्टराईले अर्का अध्यक्ष महिन्द्र राय यादवसँग सल्लाह नगरी चैत ४ केन्द्रीय कार्यकारिणी समिति बैठक र ५ गते केन्द्रीय समिति बैठक बोलाएको भन्दै महिन्द्र पक्षधरले विरोध गरेका हुन् ।

बिहीबार नेसपाका महासचिव रमेशप्रसाद यादवले एक विज्ञप्ति जारी गर्दै भट्टराईले बोलाएको बैठक आधिकारिक नभएको जानकारी गरेका छन् । ‘नेपाल समाजवादी पार्टीको केन्द्रीय कार्यकारिणी समितिको बैठक मिति २०८० चैत ४ र ५ गते बोलाइएको सूचनाप्रति गम्भीर ध्यानाकर्षण भएको छ ।

अध्यक्षद्वयको सहमतिमा बोलाउनुपर्ने बैठक अध्यक्ष महिन्द्र राय यादवको सहमतिबिनै एकपक्षीय रूपमा अध्यक्ष डा बाबुराम भट्टराईको निर्देशनमा बोलाइएकोले उक्त बैठक नेपाल समाजवादी पार्टीको बैठक नभएको विज्ञप्तिमा उल्लेख छ ।

भट्टराईले बोलाइएको बैठक स्थगित नगरे आफूहरूले बहिस्कार गर्ने उनले चेतावनी दिए । भट्टराई पछिल्लो समय माओवादीका अध्यक्ष पुष्पकमल दाहाल ‘प्रचण्ड’सँग रुष्ट भएका छन् ।

उनले आफूहरू एकताको पक्षमा भए पनि प्रचण्डले नै एकता नचाहेको आरोप लगाएका छन् । विवादकाबिच यही माघ २० गते बसेको केन्द्रीय समिति बैठकले माओवादीसँग एकता गर्ने निर्णय गरेको थियो ।