खोज

बुटवल, २९ फागुन ।

कान्ति माध्यमिक विद्यालय बुटवल ४ रुपन्देहीले गण्डकी, बागमती र मधेश प्रदेशका नमुना सामुदायिक विद्यालयका साथसाथै नमुना विश्वविद्यालयहरुमा शैक्षिक भेटघाट तथा नमुना अभ्यासको बारेमा छलफल तथा अनुभव आदानप्रदान गरेको छ ।

शैक्षिक क्षेत्र सुधारका लागि सरोकारवालाहरुले निर्वाह गर्नुपर्ने भूमिका कसरी सहज र सरल तरिकाले सञ्चालन गर्न सकिन्छ भन्ने विषयमा विद्यालय प्रशासन र शिक्षकहरुका बिचमा योजना निर्माणका लागि कुन कुन पक्षमा काम गर्न आवश्यक छ भन्ने कुरा बुझ्नका लागि कार्यक्रम गरिएको कुरा व्यवस्थापन समिति अध्यक्ष हेमानन्द शर्माले बताए ।

शैक्षिक अवलोकन भ्रमण कार्यक्रमका संयोजक विद्यालयका सहायक प्रधानाध्यापक केदारनाथ ज्ञवालीले शिक्षकहरु पेसागत क्षमता समय अनुसार देशका अन्य नमुना विद्यालयहरुले कसरी सञ्चालन गरिरहेका छन् भन्ने विषयमा अध्ययन गर्नका लागि कार्यक्रम गरिएको बताए ।

विद्यालयमा शिक्षक, अभिभावक र व्यवस्थापन समितिका बिचमा शैक्षिक गुणस्तर सुधारका लागि के कस्ता नयाँ मोडलहरु प्रयोग गर्न सकिन्छ भन्ने उद्देश्यका लागि सञ्चालन गरिएको यो शैक्षिक अध्ययन अवलोकन भ्रमण उत्साहजनक रुपले सम्पन्न भएको विद्यालय व्यवस्थापन समिति सदस्य कृष्ण प्रसाद अर्यालले बताए ।

विद्यालय देशको नमुना विद्यालय भएकोले समय अनुसार विद्यालय सँग सम्बन्धित सम्पूर्ण पक्षहरुलाई कसरी अझ धेरै व्यवस्थित गर्न सकिन्छ भन्ने विषयमा अध्ययन अनुसन्धान गर्नका लागि विद्यालयले समय समयमा यस्ता प्रकार कार्यक्रम गरिरहेको कुरा प्रधानाध्यापक गोविन्द ज्ञवालीले बताए ।

शैक्षिक अवलोकन भ्रमण कार्यक्रम अन्तर्गत नवलपुरको ढोगीको त्रिभुवन बाल मावि, दोलखाको जिरी मावि र जिरी प्राविधिक शिक्षालय जिरी नगरपालिका र काभ्रेको धुलिखेलमा रहेको काठमाडौं विश्व विद्यालयमा भएका असल अभ्यास र कान्ति माविले अपनाएका असल अभ्यासको बारेमा छलफल गरिएको थियो । कार्यक्रममा विद्यालय व्यवस्थापन समिति, शिक्षक, कर्मचारी, शिक्षक अभिभावक संघका प्रतिनिधि सहित ४० जनाको सहभागिता रहेको थियो ।