खोज

बुटवल,२७ फागुन । परिवारवादमा चुर्लुम्म डुबेको आरोप खेपिरहेका माओवादी केन्द्रका अध्यक्ष एवं प्रधानमन्त्री पुष्पकमल दाहाल प्रचण्डले फेरि परिवारवादको भद्दा नमूना हुने निर्णय पार्टीबाट गराएका छन् । जसको पछिल्लो उदाहरण राष्ट्रियसभा अध्यक्षमा नारायण दाहाललाई उम्मेदवार बनाउने पार्टीबाट निर्णय भएको छ । प्रचण्डले भाइ नारायण दाहाललाई मनोनित हुने कोटाबाट राष्ट्रिय सभा सदस्य बनाएका थिए ।

आइतबार बसेको पदाधिकारी बैठकले दाहाललाई उम्मेदवार बनाउने निर्णय गरेको एक नेताले जानकारी दिए । राष्ट्रियसभा अध्यक्षको निर्वाचन २९ फागुनमा हुँदैछ ।

एमाले, माओवादी केन्द्र र जनता समाजवादी पार्टीबीच राष्ट्रियसभा अध्यक्ष माओवादी केन्द्रले लिने सहमति भइसकेको छ ।

नेपाली कांग्रेसले भने युवराज शर्मालाई उम्मेदवार बनाउने निर्णय गरेको छ ।

नाताले प्रचण्डका भाइ पर्ने नारायण दाहाललाई उम्मेदवार बनाउने निर्णयसंगै पार्टीकै नेता कार्यकर्ता र शुभेच्छुकले यो निर्णयको चर्को आलोचना गर्न थालेका छन् । माओवादी निकट पत्रकार प्रतिक्षा काफ्लेले दाहाललाई उम्मेदवार बनाउने निर्णयप्रति कटाक्ष गर्दै लेखेकी छन् –‘प्रचण्ड परिवारमा अब नियुक्ति खान को को बाँकी छन् ? उनीहरूको पालो नसकिएसम्म अरूले अवसर पाउने भएनन् ।’

प्रचण्डले कान्छी छोरी गंगा दाहाल र र ज्वाइँ जीवन आचार्यलाई पार्टीको केन्द्रीय सदस्य बनाएका थिए । जीवन आचार्यलाई प्रदेश सांसद र मन्त्री पनि बनाएका छन् ।

छोरी रेनु दाहाल भरतपुर उपमहानगरपालिकाको मेयर छन् । बुहारी विना मगरलाई पनि प्रचण्डले सांसद र मन्त्री बनाइसकेका छन् ।