खोज

लुम्बिनी, २५ फागुन ।

लुम्बिनी साँस्कृतिक नगरपालिका वडा नं. ६ पर्साको भित्रि सडक खण्डमा भएको दुर्घटनामा एकजनाको मृत्यु भएको छ । बिहीबार राति लुम्बिनीबाट सुर्यपुरातर्फ जाँदै गरेको लु ८७ प ४२१२ नम्बरको मोटरसाइकल र विपरित दिशाबाट आउँदै गरेको लु २४ प ७८५ नम्बरको मोटरसाइकल एकआपसमा ठक्कर खाँदा लु २४ प ७८५ नम्बरको मोटरसाइकल चालकको मृत्यु भएको हो ।

मृत्यु हुनेमा कपिलवस्तुको शिवराज नगरपालिका वडा नम्बर ३ बस्ने २४ वर्षीय राजमन लोनिया रहेका छन् । दुर्घटनामा परी सोही मोटरसाइकलमा सवार दैलेख जिल्लाका २३ बर्षका भुपेन्द्र शाहीसहित चारजना घाइते भएका छन् । मृतक र शाही दुबै गौतम बुद्ध विमानस्थलमा कार्यरत कर्मचारी रहेको बताइएको छ ।

दुर्घटनामा परी घाइते भएका रुपन्देहीको गैडहवा गाउँपालिका वडा नम्बर ३ बस्ने ३४ बर्षीय राजेश चौधरीको अवस्था गम्भीर रहेको प्रहरीले जनाएको छ । त्यस्तै ३४ बर्षकी पवित्रा चौधरी, ७ बर्षका रिजिना चौधरी पनि दुर्घटनामा परी घाइते भएका छन् ।

घाइतेहरुको भैरहवाको भिम अस्पतालमा उपचार भइरहेको इलाका प्रहरी कार्यालय लुम्बिनीका निरीक्षक कन्चन तामाङले जानकारी दिए । घटनाको बारेमा थप अनुसन्धान भइरहेको छ ।