खोज

बुटवल, २२ फागुन ।

अन्तर्राष्ट्रिय श्रमिक महिला दिवसको अवसर पारेर अनेमसंघ रुपन्देहीले सिद्धार्थ बाल तथा महिला अस्पताल (आम्दा) परिसरमा सरसफाई कार्यक्रम सम्पन्न गरेको छ ।

सरसफाई कार्यक्रमको उदघाटन अनेमसंघ स्थायी कमिटी सदस्य थानकुमारी थापाले गरेकी थिइन् । “समान सहभागिता र सशक्तिकरणका लागि महिलामा लगानी” भन्ने मूल नारासहित अन्तर्राष्ट्रिय श्रमिक महिला दिवसको अवसरमा आम्दा अस्पताल परिसरमा सरसफाई गरिएको अनेमसंघ रुपन्देहीकी अध्यक्ष मधुकला कुँवरले जानकारी दिइन् ।

यसवर्षको ११४ औं अन्तर्राष्ट्रिय श्रमिक महिला दिवस अर्थात् ८ मार्चको अवसरमा अनेमसंघले विभिन्न कार्यक्रम गर्ने जानकारी पनि दिएको छ । संघले १६ दिने अभियान अन्तर्गत सरसफाई कार्यक्रम गरेको हो ।

अनेमसंघ रुपन्देहीकी अध्यक्ष कुँवरले अस्पताल परिसरमा स्वच्छ र स्वस्थ वातावरण निर्माणका लागि पनि सरसफाई जरुरी भएकाले आम्दा परिसरमा सन्देशमूलक ढंगले सरसफाई कार्यक्रम गरिएको बताइन् ।

सरसफाई कार्यक्रममा अनेमसंघ रुपन्देहीमा आवद्ध महिलाहरुको सक्रिय सहभागिता रहेको थियो । कार्यक्रमका अवसरमा अस्पतालका वरिष्ठ अधिकृत शिवप्रसाद कंडेलले स्वस्थ र निरोगी रहनका लागि सरसफाई पहिलो शर्त रहेको भन्दै अनेमसंघले प्रशंसनीय काम गरेकोमा धन्यवाद दिए ।