खोज

सुर्खेत, २१ फागुन ।

केन्द्रको सत्ता गठबन्धनमा फेरबदल भएसँगै कर्णालीमा पनि त्यसको प्रभाव पर्ने देखिन्छ । समीकरण बदलिएसँगै काँग्रेसका मन्त्रीहरु सरकारबाट बाहिरिने अवस्थामा पुगेका छन् । कर्णालीमा ८ सदस्यीय मन्त्रिपरिषद रहेको छ, जसमा नेपाली कांग्रेसले तीनवटा मन्त्रालयको जिम्मेवारी सम्हाल्दै आएको छ ।

हाल कर्णाली सरकारमा कांग्रेसबाट सामाजिक विकास मन्त्रालयमा खड्गबहादुर पोख्रेल,अर्थ मन्त्रीमा बेदराज सिंह र उद्योग, पर्यटन, वन तथा वातावरण मन्त्रालयमा कृष्णकुमार बिसी मन्त्री छन् । काँग्रेसले सरकार छाडेको खण्डमा कर्णालीमा नेकपा एमाले र माओवादी मिलेर सहज रुपमा सरकार बन्न सक्छ । ४० सदस्यीय प्रदेशसभामा बहुमतका लागि कम्तीमा २१ सांसद आवश्यक पर्छ । यहाँ माओवादी केन्द्रका १३ र एमालेका १० सांसद छन् ।

यसअघि कांग्रेस, माओवादी र एकीकृत समाजवादीका गठबन्धनको सरकार बनेको थियो । प्रदेशसभामा कांग्रेसका १४ सांसद छन् । राप्रपा, समाजवादी र स्वतन्त्र सांसद १÷१ जना छन् । कांग्रेस, राप्रपा र समाजवादी एक ठाउँमा आउँदा पनि सरकार बनाउन आवश्यक बहुमत जुट्न सक्ने देखिंदैन । त्यसैले केन्द्रमा गठबन्धन फेरिएसँगै नयाँ गठबन्धनबाटै कर्णालीमा सरकार बन्ने निश्चित छ । नयाँ गठबन्धन सरकारको नेतृत्व भने कसले गर्ने भन्ने विषयमा सबैतिर बढी चासोको विषय बनेको छ । नेकपा माओवादी केन्द्रका अध्यक्ष विमला केसीका अनुसार अहिले नयाँ गठबन्धनको सरकार बनेता पनि त्यसको नेतृत्व भने माओवादीले नै गर्ने बताइन् । ‘अहिलेसम्म त केही कुरा भएको छैन’ केसीले भनिन्, ‘हाल सरकारको नेतृत्व पनि फेरिदैन ।’

दोस्रो कार्यकाल अन्तर्गत कर्णाली सरकार गठन हुँदै गर्दा एमाले र माओवादीबीच आलोपालो सरकारको नेतृत्व गर्ने सहमति भएको थियो । तर, केन्द्रमा समीकरण बदलिएसँगै एमाले सरकारबाट बाहिरिएको थियो भने नयाँ गठबन्धनको सरकार गठन भयो । अहिले फेरबदल भएको समीकरण अनुसार पनि हाल राजकुमार शर्मा नै मुख्यमन्त्री कायम रहने देखिन्छ । शर्माको कार्यकालपछि एमाले संसदीय दलका नेता यामलाल कँडेललाई मुख्यमन्त्री बन्ने बाटो खुला हुने छ । यता एमालेका प्रमुख सचेतक टेकराज पछाईले भने कर्णालीको नेतृत्व एमालेले गर्न पाउनुपर्ने बताउँछन् । ‘अहिलेसम्म अन्य सबै दलहरुले प्रदेशको नेतृत्व गर्दै आउनुभएको छ, अब एमालेले नेतृत्व गर्न पाउनुपर्छ’ उनले भने, ‘यहाँका जनताको अपेक्षा पनि एमालेले नेतृत्व गरोस् भन्ने छ ।’