खोज

सुर्खेत, १७ फागुन ।

कर्णाली सरकार गठनसँगै प्रदेशलाई अर्गानिक बनाउने नारासँगै अर्काे नारा पनि ल्याएको थियो प्रदेशलाई डिजिटल बनाउने । तर, विधि कारणले उक्त योजना कार्यान्वयनमा आउन सकेको थिएन । कर्णाली सरकारले महत्वकांक्षी योजनाल्यायो भनेर बेला बेलामा आलोचना समेत हुँदै आएको छ ।

नीतिगत तथा प्राविधक लगायत अन्य कारणले योजना पूरा हुन नसकेको डिजिटल कर्णाली बनाउने योजना पूरा हुन नसकेकाले यसपालि दुई दिनको बहस गरिन लागिएको कर्णाली सरकारका आन्तरिक मामिला तथा कानुनमन्त्री कृष्णबहादुर जिसीले बताए ।

‘कर्णालीलाई डिजिटल प्रदेश बनाउने उद्देश्यका साथ बहसको आयोजना गर्न लागेका छौ यसबाट हाम्रो एउटा निचोड पनि निस्कन्छ’ मन्त्री जिसीले भने, ‘कार्यक्रमपछि हामी प्रतिवे्दन पेस गर्नुका साथै प्रदेशको पञ्चवर्षीय योजनामा पनि समावेश गर्ने सोच बनाएका छौ ।’

आन्तरिक मामिला तथा कानुन मन्त्रालय र आइसिटी फाउन्डेसन नेपालको आयोजनामा उक्त कार्यक्रम सुरु हुन लागेको हो । उक्त कन्क्लेभमा ४० भन्दा बढी विज्ञ तथा सरोकारवालाहरूको सहभागिता रहने कर्णाली सरकारका आन्तरिक मामिला तथा कानुनमन्त्री जिसीले जानकारी दिए ।

कर्णालीको डिजिटलाइजेसन र डेभलपमेन्ट थिममा केन्द्रित रहने कार्यक्रममा अन्य प्रदेशबाट पनि सम्बन्धित मन्त्री तथा सचिवहरूको उपस्थिति रहने बताइएको छ । कन्क्लेभमा चारवटा महत्वपूर्ण प्रस्तुति र ६ वटा प्यानल सेसनहरू रहेका छन् । डिजिटल कर्णालीको सोच र नेतृत्व विषयमा पूर्व मुख्यमन्त्रीहरूको पावर सेसन समेत हुने बताइएको छ ।

वीरेन्द्रनगरको सिद्धार्थ होटेलमा आयोजना हुने कार्यक्रममा पूर्व मुख्यमन्त्रीहरू र अन्य सरोकारवालाहरूको समेत सहभागिता रहने मन्त्री जिसीले बताए । यसैगरी कार्यक्रममा प्रदेश योजना आयोगका उपाध्यक्ष योगेन्द्र शाही, विद्युतीय सुशासन आयोगका सिइयो दिपेश विष्टसँगै युएनडिपी, नेपाल दूरसञ्चार प्राधिकरण, पिएलजिएसपी र एसिया फाउन्डेसनको तर्फबाट कार्यपत्र प्रस्तुत रहनेछ । कार्यक्रममा कर्णाली प्रदेशको कृषि, पर्यटन, शिक्षा, स्वास्थ्य, डिजिटल पहुँचलगायतका आइडियाहरू प्रस्तुत हुनेछन् । यसैगरी डिजिटल अर्थव्यवस्था र लगानीको वातावरण सम्बन्धमा प्रस्तुति र प्यानल सेसन सञ्चालन हुनेछ ।

पहिलो दिन उद्घाटन पछिको सत्रमा डिजिटल पूर्वाधार र कनेक्टिभिटी र डेटा, डिजास्टर र डेभलपमेन्ट विषयमाप्यानल सेसनहरू सञ्चालन हुनेछन् । दोस्रो दिनको पहिलो सत्रमा कर्णालीका लागि भइरहेका डिजिटल अभियान, आइडिया र प्रविधिको बारेमा केही प्रस्तुति रहनेछ । यस्तै स्थानीय, प्रादेशिक र संघीय स्तरमा डिजिटल नेतृत्व र सुशासनको सुदृष्टिकरण विषयमा प्रस्तुति र प्यानल सेसन सञ्चालन हुनेछ ।