खोज

सुर्खेत, १० फागुन ।

कर्णालीका बालवालिकाहरुमा ‘हेपटाइटिस–ए’ संक्रमण देखिएको छ । स्वास्थ्य परीक्षणको क्रममा दैलेखबाट आएका अधिकांश बालवालिकाहरुमा हेपटाइटिस–ए’ को संक्रमण देखिएको पाइएको छ । वीरेन्द्रनगरस्थित नेपाल बाल पोलिक्लिनिकका बालरोग विशेषज्ञ डा. नवराज केसीले जण्डिस देखिएर उपचारको लागि आउने बालवालिकाहरुमा परीक्षण गर्दा ‘हेपटाइटिस–ए’ पोजेटिभ देखिएको जानकारी दिए ।

‘अन्य जिल्लामा भन्दा दैलेखबाट आउने धेरै बालवालिकामा जण्डिस देखियो त्यसलाई परीक्षण गरी हेर्दा हेपाटाइटिस ए पोजेटिभ देखियो’ डा. केसीले भने, ‘दिनमा एक, दुई जना नियमित आइरहेका छन् । विशेष गरी दैलेख बजार क्षेत्रका बढी आइरहेका छन् ।’

‘हेपटाइटिस–ए’ पानीजन्य रोग हो । दूषित पानी पिउँदा यसबाट संक्रमण हुने गर्छ । डा. केसीका अनुसार हेपटाइटिस–ए का कारण जन्डिस देखा परेका बालबालिकाहरु उपचारका लागि आइरहेका छन् ।

मानवीय फोहोरहरु पानीसँग मिलेको छ भने त्यहाँबाट यस किसिमको संक्रमण हुनेगर्छ । यसका प्रमुख लक्षण पेट दुख्ने, वाकवाक हुने, ज्वरो आउने र जन्डिस हुने हो । ‘जन्डिस’भने लक्षण हो रोग होइन । धेरै कारणले देखा पर्छ त्यसमध्येको यो ‘हेपटाइटिस–ए’ मा देखिन्छ । डा. केसीका अनुसार अहिलेसम्म उपचार गरेका मध्ये ज्यानै जाने अवस्थामा त कोही आएका छैनन् तर, अलि सिकिस्त बिरामी भने आएका छन् ।

समयमा उपचार हुन सकेन भने कलेजो नै फेल हुने सक्ने केसीले बताए । समुदायमा संक्रमण फैलिन नदिन यहाँका सबै पालिकाहरुले मौसम अनुसारको स्वास्थ्य योजना बनाउन आवश्यक रहेको डा. केसीले सुझाव दिए । ‘गर्मी सुरु भयो भने पानीजन्य रोगहरु देखा पर्छन् । त्यसैले समुदायमा उपभोग गरिरहेको पानी कस्तो छ भनेर हेर्नुप¥यो’ उनले भने,
‘ढलको माथि फलफूल राखेर सागसब्जी विक्रि भईरहेको हुन्छ । जसले गर्दा यस्ता रोगहरुको संक्रमण जोखिम बढ्छ ।’