खोज

दाङ,९ फागुन ।

दाङमा दुई चरणमा दादुरा–रुबेलाविरुद्धको खोप लगाइने भएको छ । पहिलो चरणमा ९ महिनादेखि १५ वर्षसम्मका ४९ हजार ३०८ बालबालिका र दोस्रो चरणमा १ लाख २२ हजार ३ सय २६ बालबालिकालाई खोप दिइने भएको छ । पहिलो र दास्रो चरणमा गरी १ लाख ७१ हजार ६ सय ३४ बालबालिकालाई खोप लगाइने भएको स्वास्थ्य कार्यालय दाङले जनाएको छ । पहिलो चरणको खोप यही फागुन १३ गतेदेखि २१ गतेसम्ममा खोप दिइने छ भने दोस्रो चरणको फागुन २३ देखि चैत ३ गतेसम्म दिइने स्वास्थ्य कार्यालय दाङका खोप फोकल पर्सन किशोर आचार्यले जानकारी दिए ।

पहिलो चरणमा घोराही उपमहानगरपालिका, लमही नगरपालिका,राप्ती गाउँपालिका, गढवा गाउँपालिका र राजपुर गाउँपालिका बालबालिकालाई दादुरा–रुबेला खोप दिइने उनले बताए । यस्तै, दोस्रो चरणमा फागुन २३ गतेदेखि चैत ३ गतेसम्म तुलसीपुर उपमहानगरपालिका, दंगीशरण गाउँपालिका, शान्तीनगर गाउँपालिका र बबई गाउँपालिकामा खोप दिइने खोप फेकलपर्सन आचार्यले बताए ।

स्वास्थ्य कार्यालय दाङका अनुसार ९ महिनादेखि ५ वर्षमुनिका ४९ हजार ३०८ जनालाई खोप दिइने लक्ष्य छ भने ५ वर्षदेखि १५ वर्षसम्मका १ लाख २२ हजार २२६ जनालाई खोप दिइने लक्ष्य छ ।

७०५ खोप सेसन रहेका छन् । १४१० स्वास्थ्यकर्मीले खोप अभियानमा सहयोग गर्ने खोप फेकलपर्सन आचार्यले बताए । २ हजार ११५ जना स्वयंसेवक परिचालन गरिने बताइएको छ ।

दादुराले शरीरको बाहिरी छाला र भित्री पत्रहरूमा संक्रमण गर्छ जुन फोक्सो, आन्द्रा, भुँडी, आँखा, मुख र घाँटीमा रहेको हुन्छ । दादुराका भाइरसले दादुरा लागेको बेला शरीरको रोग प्रतिरोधात्मक क्षमता शक्तिलाई हप्तौंसम्म क्षति पुर्याउने आचार्यको भनाई छ ।

मिजल्स भाइरसका कारण हुने दादुरा छिट्टै सर्ने संक्रामक रोग र रुबेला भाइरसका कारण हुने दादुरा जस्तै देखिने अर्को संक्रामक रोग रुबेला भएकाले नियमित खोप अन्तर्गत दादुरा बिरुद्धको खोप लगाई सकेकाले पनि नछुटाई खोप लगाउन आचार्यले अनरोध गरे ।

दाङका दशवटै पालिकामा खोप अभियान संचालन गर्न थालिएको हुँदा सबैले सहयोग गरेर अभियान सफल बनाउन आग्रह गरिएको छ । जिल्ला समन्वय समितिका प्रमुख नित्यानन्द शर्माले खोप लाई सफल बनाउन सबैले सहयोग गर्न आग्रह गरे । प्रमुख जिल्ला अधिकारी रामबन्धु सुबेदीले दादुरा रुबेलाको खोप कोही नछुटुन भनेर सबैले सहयोग गरेर गर्न आग्रह गरे । विद्यालयमा खोप केन्द्र हुने भएकाले शिक्षकमार्फत सचेतना फैलाउन आग्रह गरे । घोराही उपमहानगरपालिकाका उपप्रमुख हुमा डिसीले बालबालिकाको लागि आएको खोप अभियानलाई सबैले सहयोग गरेर सफल बनाउन अनुरोध गरिन् । स्वास्थ्य कार्यालय दाङका प्रमुख अंगतबहादुर शाहीले खोपको औचित्य र प्रभावका बारेमा जानकारी दिएका थिए ।