खोज

बुटवल, २ फागुन ।

रुपन्देहीको देवदह नगरपालिका वडा नम्बर १ मा रहेको खड्ग माविमा सरस्वतीको मन्दिर उद्घाटन गरिएको छ ।

सरस्वती पूजा, अक्षरारम्भ, मन्दिर हस्तान्तरण, दाता सम्मान र पुरस्कार वितरण कार्यक्रमको आयोजना गरी मन्दिर उद्घाटन गरिएको हो ।

अग्रहरी युवा समाज देवदह विर्ता शङ्करपुरले निर्माण गरेको उक्त मन्दिर समाजका अध्यक्ष महेश अग्रहरीले विद्यालय व्यवस्थापन समितिका अध्यक्ष छविलाल अग्रहरी र प्रधानाध्यापक बाबुराम बस्नेतलाई वडाअध्यक्ष दिपक प्रसाद नेपालको उपस्थितिमा हस्तान्तरण गरेको प्रमाण पत्र प्रदान गरेका थिए । विद्यालयको तर्फबाट समाजका अध्यक्ष अग्रहरीलाई कदर पत्रले सम्मान समेत गरिएको थियो ।

कार्यक्रममा बोल्दै देवदह–१ का वडाध्यक्ष दीपक प्रसाद नेपालले मन्दिर निर्माण गरेर अग्रहरी समाजले राम्रो काम गरेको भन्दै प्रशंसा गरेका थिए । सोही कार्यक्रममा वसन्त पञ्चमीको अवसरमा मन्टेश्वरी कक्षामा भर्ना हुने नयाँ करिब १५ जना नानी बाबुहरुलाई वडा अध्यक्ष दीपक प्रसाद नेपाल, व्यवस्थापन समिति अध्यक्ष छविलाल अग्रहरी, महेश अग्रहरीबाट स–साना भाइ बहिनीहरुलाई अक्षरारम्भ गराएका थिए ।

विद्यालयका सल्लाहकार अजय रौनियार, डा.योगेन्द्र अग्रहरी, अग्रहरी समाजका वरिष्ठ व्यक्तित्व छविलाल अग्रहरी, सल्लाहकार अजय रौनियार, समृद्ध समुदाय विकास केन्द्रका युवराज चापागाईं, सोइया महिला स्वाबलम्बन सँस्थाकी कार्यक्रम सँयोजक रोशी गुरुङ, सामाजिक परिचालक एलिना हमाल लगायतले कार्यक्रममा मन्तव्य व्यक्त गरेका थिए ।

कार्यक्रममा सोइया महिला स्वाबलम्बन सँस्थाको आर्थिक सहयोगमा महिला हिँसा, बालविवाह र शिक्षाको महत्व शीर्षकमा आयोजित खुल्ला चित्रकला प्रतियोगितामा विजयी विद्यार्थीलाई पुरस्कार प्रदान गरिएको थियो ।