खोज

तिलोत्तमा, २६ माघ ।

पामिर ईन्टरनेशनल एकेडेमी तिलोत्तमा–२ रुपन्देहीले आफ्नो १६ औं वार्षिकोत्सव मनाएको छ । वार्षिकोत्सवमा बोल्ने अभिभावक, टोलविकास संस्थाका प्रतिनिधि एवं शिक्षा क्षेत्रका व्यक्तिहरुले संस्कारयुक्त, व्यावहारिक र प्रविधियुक्त शिक्षा आजको आवश्यकता भएको भन्दै पामिरले यी तीनै कुरामा आफूलाई अग्रसर बनाएको बताएका छन् ।

कार्यक्रमको उदघाटन गर्दै तिलोत्तमा नगरपालिकाका शिक्षा तथा खेलकूद शाखा प्रमुख गंगाराम आचार्यले रुपन्देही जिल्ला शैक्षिक हवको रुपमा विकास भएको र तिलोत्तमा क्षेत्र यसको केन्द्र बनेको भन्दै स्थानीय सरकारले समय सुहाउँदो शिक्षा नीति अंगिकार गरेको बताए ।

उनले गुणस्तरीय र प्राविधिक शिक्षालाई जोड दिएर विद्यार्थीहरुलाई व्यावहारिक र सीपयुक्त बनाउनुपर्नेमा जोड दिंदै पामिरले दिंदै आएको व्यावहारिक शिक्षाबाट सबैले अनुसरण गर्नुपर्ने बताए ।

प्याब्सन लुम्बिनी प्रदेशका अध्यक्ष लालहरि पाण्डेयले सरकारले संस्थागत विद्यालयहरुमाथि विभेद गरेको भन्दै गुणस्तरीय शिक्षा प्रदान गरिरहेका संस्थागत विद्यालयहरुमाथि विभेदपूर्ण नीति नलिन चेतावनी दिए । निजी विद्यालयहरुको लडाई सरकारसँग अहिले पनि जारी रहेको भन्दै उनले सबैले अपनत्व महशुस गर्ने गरी शिक्षा नीति तय गर्न सरकारसँग आग्रह गरे । उनले संस्थागत विद्यालयका लागि स्थानीय सरकारले संरक्षणको नीति लिनुपर्ने बताए ।

पुर्व जिल्ला शिक्षा अधिकारी टेकबहादुर थापाले शिक्षाको विकासबिना कुनै पनि क्षेत्रको विकास असम्भव भएकाले स्थानीय तहले शैक्षिक गुणस्तर वृद्धि सँगसँगै लगानी बढाउनुपर्ने बताए ।

विद्यालयका अभिभावक मुकुन्द ज्ञवालीले पामिरले दिएको सीपयुक्त र व्यावहारिक शिक्षाका कारण विद्यार्थी सिर्जनात्मक बन्दै गैरहेको भन्दै अभिभावकहरुले पनि घरमा बालमैत्री वातावरणको निर्माण गर्नुपर्ने बताए ।

मिलिजुली आमा समूहकी अध्यक्ष वसुन्धरा पाण्डेले विद्यार्थी, शिक्षक र अभिभावकबीचको सहकार्य र समन्वयले शैक्षिक स्तर सुधारमा टेवा पुग्ने भएकाले यसका लागि तीनै पक्ष जवाफदेही र जिम्मेवार हुनुपर्ने बताइन् ।

विद्यालय व्यवस्थापन समितिका अध्यक्ष मोहन चापागाईंले विद्यालयले विद्यार्थी केन्द्रित सिकाई विधिलाई जोड दिंदै आएको, प्रविधितर्फ विद्यार्थीलाई केन्द्रित गरेको, अतिरिक्त क्रियाकलापमा जोड दिएको र गुणस्तर सुधारमा विद्यालयले उल्लेख्य प्रगति हासिल गरेको बताए ।

त्यस अवसरमा विद्यालयबाट २०७४ सालमा एसईई उत्तीर्ण गर्न सफल दीक्षा भट्टराईलाई दक्षिण अफ्रिकाबाट पाइलट कोर्ष उत्तीर्ण गरेकोमा सम्मान गरिएको थियो । त्यस अवसरमा बोल्दै उनले आफ्नो सफलताको पहिलो खुड्किलो पामिर एकेडेमी रहेको भन्दै विद्यालय परिवारलाई धन्यवाद दिइन् ।

कार्यक्रममा विद्यालयका प्राचार्य गोपाल गौतम, शिक्षकद्वय केशव खनाल, नविन शाक्य लगायतले मन्तव्य व्यक्त गरेका थिए । त्यस अवसरमा बालबालिकाहरुले आ–आआफ्नो प्रतिभा प्रस्तुत गरेका थिए ।

त्यस्तै परीक्षामा उत्कृष्ट अंक ल्याउने विद्यार्थीलाई पुरस्कृत गरिएको थियो । कार्यक्रममा तेक्वान्दो खेलाडी बालबालिकाले पनि आफ्नो प्रस्तुती देखाएका थिए ।