खोज

दाङ, २२ माघ ।

तुलसीपुर उपमहानगरपालिका कार्यपालिकाको बैठक जलवायु परिवर्तनको असर र त्यस क्षेत्रको विषयमा ध्यानाकर्षण गराउनका लागि थर्कोट दाङमा सोमबार बैठक आयोजना गरिएको छ । तुलसीपुर उपमहानगरपालिका वडा नम्बर ३ मा रहेको थर्कोट दाङ जिल्लाकै उचाइमा रहेको पहाडी भूगोल हो । नेपाल एकीकरणपूर्व सल्यानका फलावाङ्गी राजा तुलसीपुर आवतजावतका क्रममा बिसाउने थलोको रुपमा रहेको थियो ।

केही वर्षअघि जलवायु परिवर्तनको असरका विषयमा हिमालयका हिउँ पग्लिएको विश्वको ध्यानाकर्षण गर्नका लागि कालापत्थरमा मन्त्री परिषद्को बैठक राखिएको थियो ।

त्यस्तै चैत महिनामा फूल्ने गुराँसको फूल र चैत महिनामै पाक्ने चैते काफल माघ महिनामै फूलेका छन् भने काफल पनि पाक्दै छन् । तुलसीपुर उपमहानगरपालिका नगरप्रमुख टीकाराम खड्काले जलवायु परिवर्तनसँग जुध्ने नीति तथा कार्यक्रममा पालिकास्तरबाट समेत निर्माणमा सहयोग पुगोस् भन्ने ध्येयले कार्यपालिका बैठक आयोजना गरिएको बताए ।

उनले थर्कोट पहाडका विषयमा ऐतिहासिक, धार्मिक, पर्यावरणीय क्षेत्रका विषयमा समेत पालिकास्तरबाट नीति, कार्यक्रम र बजेटमा व्यवस्थापनमा सबैको ध्यान पुगोस् भन्ने हिसाबले बैठक आयोजना गरिएको बताए ।

तुलसीपुर उपमहानगरपालिका वडा नम्बर ३ का वडाध्यक्ष वीरबहादुर विश्वकर्माले ऐतिहासिक र पर्यावरणका दृष्टिकोणले महत्वपूर्ण ठानिएको थर्कोटमा कार्यपालिका बैठक आयोजनासँगै त्यस क्षेत्रको विकासमा तीन तहका सरकारको ध्यान पुग्ने अपेक्षा गरेको बताए । उनले थर्कोटमा नेपालमा अङ्ग्रेज शासकहरुको आक्रमणलाई परास्त गर्नका लागि त्यो समयमा समेत थुपारेर राखेका ढुङ्गा अझै रहेको बताए ।