खोज

बुटवल, १८ माघ ।

तिलोत्तमा नगरपालिकाका प्रमुख रामकृष्ण खाणले तिलोत्तमालाई शिक्षा क्षेत्रको हबका रूपमा विकास गर्ने बताएका छन् ।

दुर्गा मावि तिनपा १४ दुर्गानगरको ३५ औँ वार्षिकोत्सव तथा अभिभावक दिवसको उद्घाटन गर्दै उनले सबै बालबालिकाले पढ्न पाउनुपर्ने नैसर्गिक अधिकार भएको उल्लेख गर्दै नगरपालिकाकले शिक्षालाई जोड दिएको बताए ।

शिक्षाका क्षेत्रमा भएका उपलब्धीहरूलाई नकार्न नहुने उल्लेख गर्दै उनले युवाहरूलाई दिग्भ्रमित पार्नेहरूबाट सचेत र सजग रहनुपर्ने बताए ।

उपप्रमुख जगेश्वरदेवी चौधरीले शिक्षा क्षेत्रको विकासका लागि थप प्रयत्नशील हुनुपर्ने बताइन् । उनले नगरपालिकासँग पर्याप्त स्रोत साधन नहुँदा शिक्षा क्षेत्रमा सोंचे अनुरूप उपलब्धि हासिल हुन नसकेको उल्लेख गर्दै सङ्घीय सरकारले शिक्षामा थप लगानी बढाउनुपर्ने उल्लेख गरिन् ।

कार्यक्रममा विद्यालयका प्रधानाध्यापक नेत्र बहादुर केसीले वार्षिक प्रतिवेदन प्रस्तुत गरेका थिए । कार्यक्रममा विद्यालय व्यवस्थापन समितिका अध्यक्ष शान्ता खरेल, विद्यालयका सहायक प्रधानाध्यापक सुमित्रा सुवेदी, विद्यालयका शिक्षक निलप्रसाद पुनलगायतले पनि बोलेका थिए ।

कार्यक्रममा विद्यालयमा वार्षिकरूपमा आयोजित विभिन्न प्रतियोगिताका उत्कृष्ट विद्यार्थी, कक्षागत रूपमा उत्कृष्ट विद्यार्थीहरू र उत्कृष्ट कक्षा शिक्षकलाई पुरस्कृत गरिएको थियो भने श्यामलाल खरेल उत्कृष्ट शिक्षक अक्षयकोषबाट प्रावि, निमावि र प्रावि तहमा उत्कृष्ट शिक्षकहरूलाई नगद र सम्मान पत्रले सम्मानित गरिएको थियो ।

विद्यालयलाई विभिन्न क्षेत्रबाट सहयोग गर्ने व्यक्तिहरूलाई सम्मानपत्रद्वारा सम्मानित गरिएको कार्यक्रममा विद्यालयका सल्लाहकार श्यामलाल खरेल, पूर्व अध्यक्ष टिकाराम पाण्डे, तिनपा वडा नं. १४का अध्यक्ष आश्विन पौडेल, नगरकार्यपालिका सदस्य रवि सेन्चुरी, पशुपति कलेजका प्रमुख जित बहादुर रास्कोटी ,टिकुलीगढमाविका अध्यक्ष फुलपति कडेल,वाउन्नकोटि सामुदायिक वनका अध्यक्ष लिल बहादुर क्षेत्रीलगायतले शुभकामना मन्तव्य राखेका थिए । कार्यक्रममा विद्यार्थीहरूले विभिन्न नृत्य प्रस्तुत गरेका थिए । यसैबिच खाणले नरपालिकाले सहयोग गरेको बस सेडको समेत उद्घाटन गरेका थिए ।