खोज

भैरहवास्थित गौतमबुद्ध अन्तर्राष्ट्रिय विमानस्थल पूर्णरूपमा सञ्चालनमा नआउँदा लुम्बिनी प्रदेशकै विकासमा धक्का पुगेको छ । व्यवसायीहरूले विमानस्थल सञ्चालनमा नआउँदा पर्यटन उद्योगलाई असर पुगेको भन्दै विभिन्न चरणमा आन्दोलन समेत गरेका छन तरपनि विमानस्थल पूर्ण सञ्चालनमा आउन सकेको छैन । बि.सं. २०७९ जेठमा उदघाटन भएको विमानस्थल नियमित सञ्चालनको लागि भैरहवाका व्यवसायीले ठूलो दवाव दिएका छन तर माग पूरा हुन नसक्नु चिन्ताको कुरा हो । विमानस्थल चलाउन तदारुकता नदेखाउने सरकारबाट के अपेक्षा गर्ने ? अन्तर्राष्ट्रिय उडानको उदघाटन हुँदै गर्दा मुलुकले ७० बर्षपछि राजधानी बाहिर पहिलो अन्तर्राष्ट्रिय उडानको अवसर पाएको थियो । अन्तर्राष्ट्रिय उडानसंगै यस क्षेत्रका पर्यटन व्यवसायीमा आशा र भरोसाको लोभलाग्दो वातावरण तयार हुँदैथियो । तर, आशा र भरोसमाथि घात भएको छ । अन्तर्राष्ट्रिय विमानस्थल सञ्चालनको लागि सरकारले ठोस पहल गर्न सकेन् । येनकेन जजिराले अन्तर्राष्ट्रिय उडान गरिरहेको थियो तर त्यसले पनि उडान नियमित गर्न सकेन । करिव डेढ बर्षको बीचमा धेरै अन्तर्राष्ट्रिय उडड्यन कम्पनीहरूले उडानको प्रतिवद्धता जनाए तर अहिलेसम्म यो विमानस्थललाई गुमराह बनाउने काम भएको छ । मुलुकले पाएको भरपर्दाे र विश्वासयोग्य उडानमा भएको अवरोधले पर्यटन व्यवसायीमा ठूलो निरासा छाएको छ । यो विमानस्थलबाट भारतसंग सिधा एयर रुट छैन । भारतले आकास उपलब्ध नगराउँदा अनिश्चयको वातावरण सिर्जना भएको बताइएपनि नेपालकै प्रशासकहरूको केन्द्रिकृत मानसिकताले यसमा धेरै काम गरेको आशंकामाथि बल पुगेको छ । त्यसमाथि जजिराले समेत यात्रुको अभाव र भैरहवामा लाग्ने हुस्सुको कारण देखाएर उडान नै बन्द गरेपछि बिमानस्थलको भविष्यलाई लिएर धेरै चिन्ता थपिएको छ । कतिपयले त उडान माफियाहरूले काठमाण्डौं बाहिरबाट अन्तर्राष्ट्रिय उडान भएको देख्नै र सुन्नै नचाहेको र उनीहरूकै कारण भैरहवाको गौतमबुद्ध अन्तर्राष्ट्रिय विमानस्थललाई जसरीपनि असफल बनाउने प्रयास गरिरहेको बताउने गरेका छन । उनीहरूको तर्कमा सत्यता पनि छ । किनभने पोखरामा बनेर तयार भएको विमानस्थलपनि पूर्ण सञ्चालनको पर्खाइमा छ ।

भैरहवाको गौतमबुद्ध अन्तर्राष्ट्रिय विमानस्थललाई जसरीपनि सफल वताउने विषयमा सरकार, यस क्षेत्रका पर्यटन व्यवसायी र आम जनता सवैको ध्यान जाओस् । पर्यटन व्यवसायीको आन्दोलनलाई सरकारले गंभीररूपमा लिनु जरुरी छ । निश्चितरूपमा गौतमबुद्ध विमानस्थलबाट अन्तर्राष्ट्रिय उडान रोकिँदा निजी क्षेत्र निराश छ । तसर्थ अव छिटोभन्दा छिटो अन्तर्राष्ट्रिय उडान सुरु होस् । अन्यथा विमानस्थल सञ्चालनका लागि लुम्बिनी प्रदेशको जनता सडकमा उत्रिन बाध्य हुने अवस्था नआओस् । विमानस्थल बनाउँदा स्थानीयबासीले यस क्षेत्रको विकास हुन्छ भनेर स्वतस्फूर्त रूपमा जग्गा दिएका थिए । त्यसभित्र भैरहवाको स्वार्थमात्र नभएर समग्र लुम्बिनी प्रदेशकै भविष्य जोडिएको थियो । आज यो बिमानस्थललाई अलपत्र बनाउने काम भएको छ । यो विमानस्थल भैरहवाबासीको मात्र नभई राष्ट्रिय गौरवको आयोजना हो । विमानस्थललाई लक्षित गरेर व्यवसायीले महंगो ब्याजदरमा बैंकबाट ऋण लिएर व्यवसायमा लगानी गरेका छन तर आज व्यवसाय डुब्ने अवस्था आएको छ । प्रदेश सरकारले विमानस्थल सञ्चालनका लागि पहल त गरेको छ तर खासै दवाव दिन नसकेको महसुस भैरहेको छ । विमानस्थल सञ्चालनमा अवरोध गर्नेहरूकै कारण विमानस्थल पूर्ण सञ्चालनमा आउन जटिलता थपिएको अवस्थामा संघीय सरकारले त्यस्ता जटिलता बुझ्ने काम गरोस् । बाहिर आश्वासनको पोका छर्ने तर भित्रबाट षडयन्त्रको तानाबाना बुन्ने काम नहोस् । अतः संघीय सरकारले नेतृत्व लिएर विमानस्थल सञ्चालनमा तदारुकता देखाओस् ।