खोज

तिलोत्तमा, २१ पुस ।

लुम्बिनी इन्जिनियरिङ्ग, म्यानेजमेन्ट एण्ड साइन्स कलेज (लेक) भलवारीमा आइतबारदेखि लेक एक्स्पो–२०२४ सुरु हुने भएको छ । कलेजका निर्देशक तुलसीप्रसाद सापकोटाका अनुसार एक्स्पोको तयारी पूरा भएको छ । एक्स्पोमा विद्यार्थीहरुले निर्माण गरेका उत्कृष्ट प्रोजेक्टहरुको प्रदर्शनी गरिने निर्देशक सापकोटाले जानकारी दिए ।

शनिबार आयोजित पत्रकार सम्मेलनमा उनले विद्यार्थीले विभिन्न क्षेत्रको अनुसन्धान गरी तयार पारेका प्रोजेक्टहरु व्यवहारिक रुपमा प्रयोग गर्न सकिने बताए । दुई दिनसम्म सञ्चालन हुने एक्स्पोमा लुम्बिनी इन्जिनियरिङ कलेजमा अध्ययनरत विद्यार्थीले उत्पादन गरेका ५० वटा प्रोजेक्ट प्रदर्शन गरिने छ । सिभिल, कम्प्युटर र इलेक्ट्रिक एण्ड इलेक्ट्रोनिकतर्फका विद्यार्थीहरुले ५० वटा प्रोजेक्ट तयार पारेको कलेजका सदस्यसचिव डा.केएन पाण्डेयले जानकारी गराए ।

विद्यार्थीले विभिन्न क्षेत्रको अनुसन्धान गरी तयार पारेका प्रोजेक्टहरु व्यावहारिक रुपमा प्रयोग गर्न सकिने उनले बताए । कलेजमा अध्ययनरत विद्यार्थीहरुको क्षमता अभिवृद्धिसहित व्यक्तित्व विकास गर्ने र देशमा नयाँ प्रविधि भित्र्याउनसमेत टेवा पु¥याउने उद्देश्यले लेक एक्स्पो आयोजना गरिएको पाण्डेले बताए ।

एक्स्पोमा सिभिल विभागतर्फका २४, कम्प्युटर विभागतर्फका १४ र इलेक्ट्रिक एण्ड इलेक्ट्रोनिक विभागतर्फबाट १२ वटा प्रोजेक्ट राखिने छन् । विद्यार्थीले बनाएका प्रोजेक्टहरु घर, उद्योग तथा विद्यालय, सडक, कृषिलगायतका क्षेत्रमा प्रयोग गर्न सकिने कार्यक्रम संयोजक इन्जिनियर विष्णुचन्द्र झाँले बताए । विद्यार्थीहरूले आफ्ना प्रतिभा तथा क्षमता प्रदर्शन गर्न सकून् र पछि कुनै कम्पनी वा संस्थामा काम गर्दा मागअनुसार प्राविधिक उपकरण, वस्तु वा कम्प्युटर सफ्ट्वेयरको डिजाइन र विकास गर्न सकून् भनेर प्रविधि प्रदर्शनीलाई प्राथमिकता दिइएको उनले बताए ।

विद्यार्थीले केही नयाँ प्रोजेक्टहरु तयार गरेको र केही पुराना भएपनि नेपालमा प्रयोगमा नआएका प्रोजेक्टहरु तयार गरेका छन् । प्रोजेक्टहरु २२ गते र २३ गते बिहान ९ बजेदेखि साँझ ५ बजेसम्म कलेज परिसरमा प्रदर्शन गरिनेछ । विद्यार्थीले तयार पारेका प्रोजेक्ट दुई दिनसम्म व्यवस्थित रुपमा स्टलहरुमा राखिने र उक्त प्रोजेक्टहरुको विश्वविद्यालयका पदाधिकारी, अभिभावक र सरोकारवालाले अवलोकन गर्ने कलेजले बताएको छ । १२ हजारले प्रोजेक्ट अवलोकन गर्ने कलेजको अपेक्षा छ । पत्रकार सम्मेलनमा इन्जिनियर कृष्णप्रसाद पराजुली, इन्जिनियर पंकज ठाकुर र सतिषकुमार कर्णले विद्यार्थीले तयार पारेका प्रोजेक्टका कामबारे जानकारी गराएका थिए ।

डिप्लोमादेखि मास्टर डिग्रीसम्म पूर्णतः इन्जिनियरिङ्ग पढाइ हुने यस कलेजमा हाल डिप्लोमा १४९, व्याचलरमा ६७५ र मास्टर डिग्रीमा ६० जना गरी जम्मा ८८४ जना विद्यार्थी अध्ययनरत रहेका छन् भने कलेजले विद्यार्थीहरूको प्रतिभा तथा क्षमता प्रदर्शन गर्न एक्स्पो आयोजना गर्दै आइरहेको थियो ।