खोज

सुर्खेत, १७ पुस ।

गएको शुक्रवार काठमाडौस्थित बालकुमारीमा प्रहरीको झडपको क्रममा मारिएका सुजन रावतको शव मंगलबार दैलेख पुगेपछि यतिबेला जिल्ला शोकमा डुबेको छ । कोरियन भाषा परीक्षाका लागि आवेदन दिन काठमाडौं पुगेका दैलेखका २३ वर्षीय रावतको शव बाकसमा फर्किएपछि उनका परिवार तथा आफन्तजनहरु शेकमा छन् ।

युवाहरूले ईपीएस शाखा कार्यालय बालकुमारी नजिकै भएको आन्दोलनमा ज्यान गुमाएका सुजनको शव नेपाली सेनाको हेलिकोप्टरमार्फत दैलेख पु¥याइएको हो । सेनाको हेलिकोप्टर सुजनको शवको पु¥याइना साथ उनका आफन्तहरू भक्कानिए ।

श्रीमान् गुमाएको वर्ष दिनमै छोरा गुमाउँदा भावविह्वल बनेकी नन्दा कटुवाल (रावत) छोराको शव देख्नासाथ सम्हालिन गाह्रो भयो । उनलाई आफन्तहरूले सान्त्वना दिने प्रयास गरिरहेका देखिन्थे ।

बुवा बितेपछि आमा, बहिनी र भाइको पालनपोषण गर्ने जिम्मेवारी बोकेका सुजनको मृत्युले आफन्तहरूमा सन्नाटा छाएको छ । श्रद्धाञ्जली दिन उपस्थित भएकाहरू पनि भक्कानिदै रोएका थिए ।

गएको शुक्रवार बालकुमारीमा प्रहरीको झडपमा परी दुई युवाको ज्यान गएको विषयलाई लिएर कर्णालीमा युवाहरु प्रद्धर्शन गर्नुका साथै उपप्रधानमन्त्री तथा गृहमन्त्री नारायणकाजी श्रेष्ठ र भौतिक पूर्वाधार तथा यातायातमन्त्री प्रकाश ज्वालाको पुत्ला जलाएका थिए । सरकार र पीडित पक्षबिच सहमति भएपछि आन्दोलनका कार्यक्रमहरु स्थगित गरिएको हो ।