खोज

धनगढी, १६ पुस

स्वास्थ्य तथा जनसङ्ख्या मन्त्री मोहन बस्नेतले कैलालीको गेटामा एक सय शैय्याको अस्पतालबाट गुणस्तरीय सेवा प्रवाह हुने बताएका छन् ।

सोमबार धनगढीमा प्रेस युनियनले आयोजना गरेको पत्रकार सम्मेलन बोल्दै मन्त्री बस्नेतले गेटामा अहिले विश्व विद्यालय वा प्रतिष्ठानको लागि हतार गर्नु पर्ने बेला नभएको दाबी गरे । ‘पहिले चरणमा सय शय्याको अस्पताललाई बलियो बनाउँछौँ त्यसपछि तीन सय शय्याको अस्पतालबाट सेवा प्रवाह हुन्छ अनि मात्रै विश्व विद्यालय वा प्रतिष्ठान तर्फ जान्छौँ। हामीले १४१ दरबन्दी पठाइसकेका छौँ । त्यो अनुसार अस्पताल बलियो बनाएपछि हुन्छ अहिले विश्वविद्यालय भन्दा हतार हुन्छ,’ मन्त्री बस्नेतले भने ।

विश्व विद्यालय तत्काल नै बन्न सम्भव नभएको बताउँदै उनले गेटामा भौतिक संरचना निर्माण भए पनि त्यसलाई सञ्चालनमा ल्याउन अझै धेरै काम बाँकी रहेको जिकिर गरे ।

१ सय ४१ अस्थायी दरबन्दी रहेको अस्पताल गत कार्तिक १ देखि सञ्चालनमा छ । हाल सम्म १ हजार ३७ जना बिरामीको उपचार गरिएको छ ।

‘गेटालाई विश्व विद्यालयको रूपमा अगाडी बढाउने र नेपालकै सानदार प्रोजेक्ट बनाउने हाम्रो सपना हो । त्यो कुरामा पुग्न हामीले पहिले अस्पताल बलियो बनाउनु पर्छ । अस्पताल बलियो नभए विश्वविद्यालय वा अन्य संरचना बलियो बन्न सक्दैन,’मन्त्री बस्नेतले भने । स्वास्थ्य क्षेत्रको सुधारका लागी चिकित्सा शिक्षा ऐनलाई संशोधन गर्न पहल भइरहेको मन्त्री बस्नेतले दाबी गरे ।

आइतबार धनगढी पुगेका मन्त्री बस्नेतले धनगढी पुगे लगत्तै प्रस्तावित शहीद दशरथ चन्द स्वास्थ्य विज्ञान विश्वविद्यालयको अनुगमन समेत गरेका थिए । गेटाको अनुगमन पछि मन्त्री बस्नेत डडेल्धुरा अस्पतालमा पनि पुगेका थिए। सुदूरपश्चिमको कार्यक्रम तालिका सकिए सँगै मन्त्री बस्नेत आजै काठमाडौँ फर्किएका छन् ।