खोज

सुर्खेत, २९ मंसिर ।

कर्णालीमा नेपाल प्रहरी श्रीमती संघको प्रदेश कार्यालय स्थापना गरिएको छ । प्रदेश प्रहरी कार्यालय सुर्खेतमा संघको प्रदेश कार्यालयको स्थापना गरिएको हो । प्रदेश कार्यालयको नेपाल प्रहरी श्रीमती संघका केन्दीय अध्यक्ष लक्ष्मी कुँवरद्वारा उद्घाटन गरिएको हो । कार्यालय भवनको उद्घाटन गर्दै अध्यक्ष कुँवरले नेपाल प्रहरी श्रीमती संघले कर्णाली प्रदेशमा मानव सेवाका काम गरेको जानकारी गराउँदै आगामी दिनमा यस्ता कामहरुले निरन्तरता पाउने र थप परिस्कृत तथा रचनात्मक कार्यहरु गर्दै जानेमा विश्वस्त रहेको बताइन् ।

नेपाल प्रहरी श्रीमती संघ कर्णाली प्रदेश अध्यक्ष विन्दु ढकालले कार्यालयको स्थापना पश्चात थप सशक्त भएर आगामी दिनमा कार्यक्रमहरु गर्दै जाने बताईन । कर्णाली प्रदेशमा अझै पनि श्रीमती संघले थुप्रै कार्यक्रमहरु आयोजना गर्ने उद्देश्य लिएकोले यसमा पनि सबैको सहयोग र सहकार्यको आवश्यकता रहेको उनको भनाई छ ।

नेपाल प्रहरी श्रीमती संघको आयोजना र कर्णाली प्रदेश प्रहरी श्रीमती संघको समन्वयमा जाजरकोट र रुकुम पश्चिमका भूकम्पबाट प्रभावितहरुलाई राहात वितरण, दैलेखको राउटे बस्तीमा स्वास्थ्य शिविर तथा न्यानो कपडा वितरण गरिएको थियो । त्यसैगरी देउती बज्यै सरसफाई, मानव सेवा आश्रममा सहयोग वितरण, नेपाल पुलिस स्कुल सुर्खेतमा छात्रवृत्ति तथा शैक्षिक सामग्री हस्तान्तरण लगायतका कार्यक्रमहरु गरिएको थियो ।