खोज

सुर्खेत, २७ मंसिर ।

नेपाल प्रहरी श्रीमती संघले जाजरकोट र पश्चिम रुकुमका भूकम्प पीडितहरुलाई राहत वितरण गरेको छ । नेपाल प्रहरी श्रीमती संघ केन्द्रीय कार्यालयको आयोजना र नेपाल प्रहरी श्रीमती संघ कर्णाली प्रदेशको समन्वयमा उक्त राहत सामग्री वितरण गरिएको हो ।

जाजरकोटको भेरी नगरपालिका वडा नम्बर १ राउत गाउँमा रहेका भूकम्प पीडित ४२ जना सुत्केरी महिला, ५० जना विद्यार्थी, ३१ जना मृतकका आफन्त र ४ जना जेष्ठ नागरिक सहित १ सय २७ घर परिवारलाई राहात सामग्री हस्तान्तरण गरिएको हो । यस्तै रुकुम पश्चिम आठबिसकोट नगरपालिका १४ छेपारेका ४२ जना मृतकका २८ जना घरपरिवारलाई थर्मस, बल्याङ्केट, मोजा, ट्राउजर, मण्डी, टोपी स्विटर, एक्वाबक्स र भूकम्पबाट पीडित भएका विद्यार्थीहरूको लागि झोला, कापी र कलम सहितका राहत सामग्री हस्तान्तरण गरिएको छ ।

नेपाल प्रहरी श्रीमती संघकी केन्द्रीय अध्यक्ष लक्ष्मी कुँवर लगायतका पदाधिकारीहरु भूकम्प प्रभावित ठाउँमा पुगेर राहत सामग्री हस्तान्तरण गरेका छन् । नेपाल प्रहरी श्रीमती सघको केन्द्रीय अध्यक्ष लक्ष्मी कुँवरले जाजरकोट र रूकुम पश्चिममा स्थलगत रूपमा उपस्थित भएर वितरण गरिएको राहतले आपसी सद्भाव, एकता र राष्ट्रिय भावनाको विकास हुने बताउँदै यस्तो विपद्को समयमा सबै एकजुट भएर एकअर्कालाई सहयोग गर्नुपर्नेमा जोड दिइन् । सेवाभावले अग्र पंक्तिमा सधै अग्रसर भईरहने र संघले सदैव पीडामा परेका नागरिकहरूलाई जुनसुकै परिस्थितिमा पनि सेवा प्रदान गर्नको लागि अहोरात्र खटिरहेको बताइन । भूकम्प पीडित परिवारहरूलाई तत्काल राहत प्रदान गर्नको लागि नेपाल सरकारको प्रधानमन्त्री राहत कोषमा नेपाल प्रहरी श्रीमती संघको तर्फबाट रू ५ लाख ५५ हजार ५ सय ५५ रूपैयाँ उपलब्ध गराईसकेको उनले बताइन् ।

राहत वितरण कार्यक्रममा केन्द्रीय कार्यसमिति सल्लाहकार निलम कडायत, सहकोषाध्यक्ष कमला खनाल, नेपाल प्रहरी श्रीमती संघ कर्णाली प्रदेश अध्यक्ष बिन्दु अधिकारी ढकाललगायतको सहभागिता थियो । त्यसैगरी कर्णाली प्रदेश प्रहरी प्रमुख प्रहरी नायव महानिरीक्षक भिम प्रसाद ढकाल, जाजरकोट जिल्लाका प्रमुख जिल्ला अधिकारी सुरेश सुनार, जिल्लामा रहेका सुरक्षा निकायका प्रमुखको सहभागितामा उक्त राहत सामग्री वितरण गरिएको थियो ।